چندی گڑھ: زندگی میں کچھ اس طرح کے واقعات رونما ہوتے ہیں جنہیں سن کر انسان کے لیے اس پر یقین کرنا کچھ مشکل ہوجاتا ہے ایسا ہی کچھ ہوا بھارت میں جہاں مردہ قرارد یئے جانے والا ایک شخص جلائے جانے سے چند منٹ قبل زندہ ہوگیا جسے دیکھ کر اس کے رشتے دار خوشگوار حیرت میں ڈوب گئے۔

بھارتی میڈیا کے مطابق بھارتی پنجاب میں ایک 72 سال کے شخص دیپک سنگھ جلائے جانے سے چند منٹ قبل زندگی کی طرف لوٹ آیا۔ دیپک کے پوتے نے واقعے کی تفصیل بتاتے ہوئے کہا کہ  دادا اپنے جانوروں کی دیکھ بھال کر رہے تھے کہ اچانک پھسل کر گر پڑے جس کے بعد وہ اسے اٹھا کر گھر لایا ان کی نبض اور دھڑکن چیک کرنے کے بعد انکی موت کا یقین ہوگیا تاہم مزید تصدیق کے لیے ڈاکٹر کوبلایا گیا جس نے معائنے کے بعد دادا کو مردہ قراردے دیا۔ مردہ قرارد دیئےجانے کے بعد دادا کی آخری رسومات کی ادائیگی کا انتظام شروع کردیا گیا جبکہ ان کے جسم کو مذہبی رسومات کے مطابق آگ لگانے کے لئے لکڑیاں بھی جلا دی گئیں۔

پوتے کا کہنا تھا  کہ خاندان کے افراد جب  میت کے لیے مذہبی گیت گارہے تھے  کہ اچانک دادا کے جسم میں حرکت شروع ہوگئی اور وہ میت کے لیے گائے جانے والے مذہبی گیت سن کر حیرت سے لوگوں کو دیکھنے لگے، دادا اٹھ کر بیٹھے تو خاندان ک لوگ حیرت زدہ رہ گئے اور سوگوار ماحول اور میت کے گانوں کی جگہ خوشی کے شادیانوں نے لے لی۔ پوتے کا کہنا تھا کہ شکر ہے کہ ہم نے انہیں آگ میں نہیں ڈالا اور وہ بروقت ہوش میں آگئے۔