ممبئی(نیوز ڈیسک)بولی وڈ کھلاڑی اداکار اکشے کمار کا کہنا ہے کہ وہ کبھی کسی فلم کی ہدایتکاری نہیں کریں گے۔اکشے کمار بولی وڈ کی متعدد فلموں میں اداکاری کر چکے ہیں جس کے ساتھ ساتھ کافی فلمیں بھی انکی پروڈکشن کمپنی پروڈیوس کر چکی ہے۔انڈین اخبار کے مطابق اپنی آنے والی فلم سنگھ از بلنگ کے پروموشن ایونٹ کے دوران اکشے کمار کا کہنا تھا کہ انہوں نے ہندی سنیما میں اپنے 25 سال مکمل کر لیے ہیں جس کی وجہ لوگوں کو ان کا کام پسند آنا ہے۔اکشے کا مزید کہنا تھا کہ وہ مختلف قسم کے کرداروں میں نظر آنا چاہتے ہیں جس کے ساتھ ساتھ وہ فلم کی پروڈکشن کا کام بھی جاری رکھیں گے تاہم فلموں کی ہدایتکاری کبھی نہیں کریں گے۔اکشے کمار کی فلم سنگھ از بلنگ میں ان کے ہمراہ بولی وڈ اداکارہ لارا دتا اور ہولی وڈ اداکارہ ایمی جیکسن اہم کردار کرتی نظر آئیں گی۔ایمی جیکسن کی اپنی فلم میں شمولیت کے حوالے سے اکشے کا کہنا تھا کہ ایسا نہیں ہے کہ بولی وڈ میں ہنر کی کمی ہے۔بولی وڈ اداکارائیں رومانوی سے لے کر ایکشن اور ہر طرح کے کردار کو نبھا سکتی ہیں البتہ اس فلم میں ایک ایسی اداکارہ کی ضرورت تھی جو ہندی زبان نہ بول سکے اور ایمی اس کردار کے لیے بہترین ہیں۔فلم سنگھ از بلنگ اکتوبر میں ریلیز کی جائے گی۔