نئی دہلی (این این آئی)بھارت میں ڈاکٹرنے زبان کے آپریشن کے لئے آئے بچے کے ختنے کردیئے ۔بھارتی میڈیا کے مطابق ریاست اترپردیش کے شہر بریلی میں 3سالہ بچے کو ہسپتال میں زبان کا آپریشن کروانے کیلئے لایا گیا لیکن ڈاکٹر نے اس کا ختنہ کردیا جس کے بعد بچے کے گھر والوں نے پولیس کو شکایت درج کرائی۔

اس حوالے سے ڈپٹی چیف منسٹر نے ایک ٹوئٹ میں بتایا کہ انہوں نے محکمہ صحت کی ٹیم کو اس معاملے کی تحقیقات کیلئے ہسپتال بھیجا ہے، اگر یہ شکایت درست ثابت ہوئی تو بریلی کے چیف میڈیکل آفسر کو حکم دیا گیا ہے کہ وہ قصوروار ڈاکٹر اور اسپتال انتظامیہ کے خلاف ایف آئی آر درج کریں، مذکورہ اسپتال کی رجسٹریشن کو فوری طور پر منسوخ کریں اور 24 گھنٹے کے اندر اس کی مکمل رپورٹ پیش کرکے کارروائی کی جائے۔اس موقع پر چیف میڈیکل آفیسر ڈاکٹر بلبیر سنگھ نے کہا کہ ڈاکٹرز پر مشتمل ایک پینل ہسپتال پہنچا ہے اور انہوں نے مذکورہ ڈاکٹر سمیت تمام اسٹاف کا بیان حاصل کیا ہے اس کے علاوہ بچے کی فیملی کا بھی بیان ریکارڈ کیا گیا ہے۔انہوں نے کہا کہ ضروری کارروائی کی جارہی ہے اور اسپتال کی ضرروی دستاویزات کو تحویل میں لے کر اسپتال کا لائسنس بھی منسوخ کردیا گیا ہے۔دوسری جانب واقعے کی اطلاع میڈیا پر آنے کے بعد ہندو انتہا پسند بھی میدان میں آگئے اور بچے کی ختنہ کرنے پر اسپتال کے باہر احتجاج کیا۔