اسلام آباد (مانیٹرنگ ڈیسک) پاکستان اور بھارت پھر آمنے سامنے، زلمی اور نائٹ رائیڈرز کے درمیان میچ کا اعلان، کرکٹ شائقین کا جوش و خروش عروج پر، تفصیلات کے مطابق چیمپیئنز ٹرافی کے فائنل میں پاکستان کی بھارت کے خلاف شاندار فتح دیکھنے کے بعد اب کرکٹ شائقین کو جاوید آفریدی کی زلمی اور شاہ رخ خان کی نائٹ رائیڈرز کے درمیان مقابلہ بھی جلد دیکھنے کو ملے گا۔

جنوبی افریقہ میں گلوبل ٹی ٹوئنٹی لیگ ہونے جا رہی ہے اس لیگ میں جاوید آفریدی کی ٹیم بینونی زلمی اور شاہ رخ خان کی ٹیم کیپ ٹاؤن نائٹ رائیڈرزکے درمیان مقابلہ ہو گا۔ روز گلوبل ٹی ٹوئنٹی لیگ کے لیے جاوید آفریدی کی ٹیم بینونی زلمی کے لوگو کی تقریب رونمائی جوہانسبرگ کے ایک ہائی سکول میں منعقد کی گئی۔ اس موقع پر پشاور زلمی کے جاوید آفریدی نے کہا کہ بینونی زلمی اور کیپ ٹاؤن نائٹ رائیڈرز کا میچ گلوبل ٹی ٹوئنٹی کے لیے ایک اشتہاری میچ ہو گا۔ جاوید آفریدی نے کہا کہ میرے لیے بڑا دن ہے، جنوبی افریقہ کے لوگوں میں کرکٹ کا بہت جنون ہے۔ شاہ رخ خان کی ٹیم کیپ ٹاؤن نائٹ رائیڈرز اور جاوید آفریدی کی ٹیم بینونی زلمی کے مقابلے کے پوسٹرز بھی سوشل میڈیا پر آ گئے ہیں۔ جنوبی افریقہ کے اوپنر بلے باز ڈی کوک بینونی زلمی کی قیادت سنبھالیں گے۔ پشاور زلمی کے مالک جاوید آفریدی نے کہا کہ میری ٹیم پی ایس ایل کی فاتح ٹیم ہے اور میری خواہش ہے کہ آئی پی ایل کی فاتح ٹیم کلکتہ نائٹ رائیڈرز کے ساتھ پشاور زلمی کے تین میچوں کی سیریز ہو مگر ابھی صورتحال ایسی نہیں کہ یہ سیریز ہو سکے۔ جاوید آفریدی نے کہا کہ بینونی زلمی اور کیپ ٹاؤن نائٹ رائیڈرز کا میچ بالکل پاک بھارت میچ کی طرح ہی ہو گا اور لوگوں کو ایک اچھا مقابلہ دیکھنے کو ملے گا۔