میرپور ڈھاکہ (نیوز ڈیسک) پاکستان اور بنگلہ دیش کے درمیان میر پور میں دوسرا اور آخری ٹیسٹ جاری ہے۔ یونس خان کے بعد اظہر علی اور اسد شفیق نے بھی سنچریاں جڑ دی ہیں۔ اظہر علی نے سنچری کو ڈبل سنچری میں تبدیل کردیا ہے جو ان کے کیریئر کی پہلی ڈبل سنچری ہے۔ انہوں نے مجموعی طور پر 8 ویں سنچری مکمل کی جبکہ اسد شفیق کی یہ چھٹی سنچری ہے۔ دونوں کھلاڑیوں نے اس اننگز کے اندر اپنے اپنے سنگ میل عبور کیے ہیں۔ اظہر علی نے 3 ہزار رنز جبکہ اسد شفیق نے ٹیسٹ میچوں میں 2 ہزار رنز مکمل کرلئے۔ دونوں کے درمیان چوتھی وکٹ کی شراکت میں 200 سے زیادہ رنز کا اضافہ ہوچکا تھا۔ اس سے قبل اظہر علی نے یونس خان کے ہمراہ تیسری وکٹ پر 250 رنز کا اضافہ کیا تھا۔