اسلام آباد (نیوز ڈیسک)حکومتِ پاکستان نے دوہری شہریت رکھنے والے پاکستانی شہریوں کے لیے نئی سفری پالیسی متعارف کرا دی ہے،

جس پر ملک کے تمام بین الاقوامی ہوائی اڈوں پر فوری عملدرآمد شروع کر دیا گیا ہے۔ اس سلسلے میں امیگریشن حکام کو بھی نئی ہدایات جاری کر دی گئی ہیں۔میڈیا رپورٹس کے مطابق نئے ضوابط کے تحت بیرونِ ملک سے پاکستان آنے والے دوہری شہریت کے حامل افراد کے لیے لازم ہوگا کہ وہ اپنے غیر ملکی پاسپورٹ کے ساتھ یا تو درست پاکستانی ویزا یا کارآمد نائیکوپ (NICOP) پیش کریں۔ذرائع کا کہنا ہے کہ اب زائد المیعاد نائیکوپ رکھنے والے پاکستانی شہریوں کو پاکستان میں داخلے کی اجازت نہیں دی جائے گی۔ اسی طرح منسوخ شدہ نائیکوپ کے ذریعے بھی ملک میں داخل ہونا ممکن نہیں ہوگا۔

نئی ہدایات کا اطلاق برطانیہ سمیت دنیا کے تمام ممالک سے آنے والے دوہری شہریت رکھنے والے پاکستانیوں پر یکساں طور پر ہوگا۔حکام کے مطابق غیر ملکی پاسپورٹ پر سفر کرنے والے ہر دوہری شہریت یافتہ پاکستانی کے لیے ضروری ہے کہ وہ سفر سے قبل اپنے پاکستانی ویزا یا نائیکوپ کی مدت اور حیثیت کی تصدیق کر لے، تاکہ پاکستان آمد کے وقت کسی قسم کی دشواری کا سامنا نہ کرنا پڑے۔