اسلام آباد(مانیـٹرنگ ڈیسک)امریکیوں نے برصغیر کے عظیم سپہ سالار حیدر علی جو ٹیپو سلطان کے والد تھے کو امریکی جنگ آزادی کا ہیرو قرار دے دیا۔تفصیلات کے مطابق لسٹ ورس نامی ایک ویب سائٹ نے ان دس سپہ سالاروں کی فہرست مرتب کر کے جاری کی ہے جس میں انہوں نے ان غیر ملکی جنگجوؤں کا تذکرہ کیا ہے جنہوں نے امریکا کی سرزمین سے دور رہ کر امریکا کی جنگ آزادی میں اہم کردار ادا کیا ۔
یاد رہےکہ امریکا کی جنگ آزادی 1765 سے 1783 کے درمیان لڑی گئی جوبرطانوی تسلط کے خلاف تھی۔ اس جنگ میں امریکیوں نے برطانویوں کو شکست فاش دے کر اپنے ملک سے نکال پھینکا تھا۔ویب سائٹ پر جاری مضمون کے مصنف مارک اولیور کے مطابق امریکا کی یہ جنگ صرف امریکا کی سرزمین پر نہیں بلکہ دنیا کے ہر اس حصے میں لڑی گئی جہاں انگریزوں نے اپنا تسلط جما رکھا تھا۔ اس جنگ میں جن غیر ملکی سپہ سالاروں نے امریکیوں کا ساتھ دیا ان میں حیدر علی سر فہرست ہیں۔ مضمون کے مطابق حیدر علی نے انگریزوں کے خلاف فرانسیسی مددحاصل کر کے ان کو شدید زک پہنچائی تھی۔ واضح رہے کہ اس سے قبل بھی کئی مورخین برصغیر کو امریکی جنگ آزادی کا آخری میدان قرار دے چکے ہیں جہاں انگریزوں کو عبرت ناک شکست اٹھانی پڑی اور برطانوی گرفت نوآبادیات سے کمزور ہونا شروع ہو گئی اور وہ اتنے محاذوں پر یکساں توجہ نہ دے سکے جس کا فائدہ امریکیوں کو اپنی جنگ آزادی میں حاصل ہوا اور انہوں نے برطانوی سامراج سے چھٹکارا حاصل کر لیا۔
