ممبئی (این این آئی)ملیالم فلم انڈسٹری کے اسٹار اداکار پرتھوی راج سوکمارن فلم کی شوٹنگ کے دوران حادثے کا شکار ہوگئے۔بھارتی میڈیا رپورٹ کے مطابق اداکار اپنی فلم ولایت بدھا کی شوٹنگ کے دوران حادثے کا شکار ہوئے، وہ فی الحال اسپتال میں زیر علاج ہیں، جن کی جلد ہی سرجری متوقع ہے۔
اداکار کی ٹانگ میں گہری چوٹ آئی ہے، اسی لیے ڈاکٹروں نے ان کی سرجری کا فیصلہ کیا ہے۔بھارتی میڈیا رپورٹ کے مطابق پرتھوی راج سوکمارن سرجری کے بعد ڈاکٹروں کی ہدایت پر زخم بھرنے تک کام سے وقفہ لینے کا ارادہ رکھتے ہیں۔رپورٹ کے مطابق ولایت بدھا کی شوٹنگ کوچن کے علاقے مریور میں جاری تھی، فائٹنگ سین کی عکس بندی کے دوران اداکار حادثے کا شکار ہوگئے۔اداکار کو فوری طور پر قریبی اسپتال منتقل کیا گیا، جہاں ڈاکٹروں نے ٹانگ کے زخم دیکھتے ہوئے ان کی فوری سرجری کا فیصلہ کیا ہے۔رپورٹ کے مطابق اداکار کو سرجری کے بعد مکمل طور پر صحتیاب ہونے میں 2 تا 3 ماہ کا عرصہ لگ سکتا ہے۔فی الحال اس حوالے سے اداکار یا اسپتال انتظامیہ نے باضابطہ کوئی اعلان نہیں کیا ہے۔
