کوہلو (این این آئی)بلوچستا ن کے ضلع کوہلو کے علاقے دکی میں ایک شخص نے اپنی نوجوان بیوی کو بدکرداری کا الزام لگا کر پھانسی دے دی۔میڈیا کی رپورٹ کے مطابق اس شخص نے اپنی 22 سالہ بیوی پر الزام لگایا کہ اس کا کسی دوسرے شخص سے تعلق ہے

اور اسے گھر کے اندر رسی سے پھندہ دے کر لٹکا دیا۔ملزم کے اپنی بیوی سے 2 بچے بھی ہیں۔مقتولہ کے بھائی نے اس الزام کی تردید کی اور دعوی کیا کہ اس کی بہن کے شوہر نے اسے اپنے بھائی کی مدد سے قتل کیا۔مقتولہ کے بھائی نے الزام لگایا کہ انہوں نے میری بہن کو گلا دبا کر قتل کیا اور لوہے کی گرم سلاخ سے جلایا اور پوسٹ مارٹم میں موت سے پہلے تشدد کی تصدیق ہوئی ہے۔بھائی کے مطابق یہ وٹے سٹے کی شادی تھی اور اس نے اپنے بہنوئی کی بہن سے شادی کی تھی۔انہوں نے کہا کہ ان کی بہن ہمیشہ شکایت کرتی رہتی تھی کہ اس کا شوہر اور خاندان کے دیگر افراد اس پر تشدد کرتے ہیں۔لیویز حکام نے دو افراد کے خلاف مقدمہ درج کر کے تفتیش شروع کر دی ہے۔