پھکر(این این آئی)ڈی پی او بھکر نے 18 مارچ داجل چیک پوسٹ پر کار سے اسلحے کی بھاری مقدار کی برآمدگی کے معاملے پر کہا ہے کہ گرفتار ملزمان برآمد اسلحے میں سے 13 کے لائسنس پیش کر سکے ہیں،بھکر سے پکڑا گیا اسلحہ علی گنڈاپور کا تھا جو زمان پارک لے جایا جا رہا تھا۔ میڈیا سے گفتگو کرتے ہوئے ڈی پی او بھکر نے بتایا کہ گرفتار ملزمان برآمد اسلحے میں سے 13 کے لائسنس پیش کر سکے ہیں۔انہوں نے کہاکہ ملزم نے اپنے بیان میں بتایا کہ باقی 9 رائفلز علی امین گنڈہ پور کی تھیں جو انہوں زمان پارک پہنچانے کیلئے دی تھیں۔ڈی پی او نے کہا کہ فراہم کردہ اسلحہ لائسنس بلوچستان سے جاری شدہ ہیں جن کی تصدیق بھی کرائیں گے، برآمد ہونے والی رائفلز بھی فارنزک لیب کو بھجوائی جائیں گی۔انہوں نے کہاکہ تحقیقات کی جا رہی ہیں اسلحہ زمان پارک کس مقصد کیلئے لے جایا جا رہا تھا۔