اسلام آباد (این این آئی)وفاقی کابینہ نے عدالتی اصلاحات ترمیمی بل کا مسودہ منظورکرلیا جس کے مطابق از خود نوٹس کا فیصلہ تین سینئر ججز کریں گے، از خود نوٹس کے خلاف اپیل کا حق ہوگا اور 30 دن میں اپیل دائر ہوسکے گی، اپیل کو دوہفتوں میں فکس کیا جائیگا۔

نجی ٹی وی نے ذرائع کے حوالے سے بتایاکہ وزیراعظم شہبازشریف کی زیر صدارت وفاقی کابینہ کا اجلاس ہواجس میں عدالتی اصلاحات ترمیمی بل کا مسودہ منظور کیا گیا۔ذرائع کے مطابق ترمیمی بل کے مطابق از خود نوٹس کا فیصلہ تین سینئر ججز کریں گے، تین رکنی سینئر ججز کی کمیٹی از خودنوٹس کا فیصلہ کرے گی۔ترمیمی بل کے تحت از خود نوٹس کے خلاف اپیل کا حق ہوگا اور 30 دن میں اپیل دائر ہوسکے گی، اپیل کو دو ہفتوں میں فکس کیا جائے گا۔ذرائع کے مطابق قومی اسمبلی میں مسودہ پیش ہونے کے بعد قومی اسمبلی قائمہ کمیٹی قانون و انصاف کا اجلاس (آج) صبح ہوگا جس کی صدارت چیئرمین محمود بشیر ورک کریں گے۔ذرائع نے بتایا کہ قائمہ کمیٹی قانون و انصاف کل ہی بل منظور کرکے ایوان میں رپورٹ دیگی، قومی اسمبلی (آج) بدھ کو عدالتی اصلاحات ترمیمی بل کی حتمی منظوری دے گی اور پھر مجوزہ بل جمعرات کو سینیٹ میں منظوری کیلئے پیش کیا جائے گا۔