اسلام آباد (مانیٹرنگ ڈیسک /این این آئی)وفاقی حکومت نے سستا پٹرول سکیم موخر کرنے کا فیصلہ کر لیا۔نجی ٹی وی کے مطابق وزارت خزانہ کے ذرائع کے مطابق سبسڈی لانچ کرنے سے پہلے آئی ایم ایف سے مشورہ ضروری ہےسستا پیٹرول سکیم کی لانچنگ کیلئے نئے طریقے پر کام شروع ہو گیا ہے ۔

دوسری جانب وزیر مملکت برائے پیٹرولیم مصدق ملک نے کہا ہے کہ  سستے فیول پروگرام پر آئی ایم ایف کا اعتراض نہیں بنتا۔ایک بیان میں مصدق ملک نے کہا کہ امیر کیلئے فیول مہنگا اور غریب کیلئے سستاکر رہے ہیں اور اس پروگرام پر کوئی سبسڈی نہیں ہوگی۔ انہوں نے کہا کہ ملک میں سڑکوں پر 2کروڑ موٹر سائیکلیں ہیں، اس اسکیم سے 800 سی سی گاڑیاں ملا کر 2کروڑ 14لاکھ موٹرسائیکل اور گاڑیاں فائدہ اٹھائیں گی، موٹر سائیکلز پر ماہانہ 420 ملین لیٹر پیٹرول استعمال ہوگا، گاڑیوں سمیت موٹر سائیکلز کے لیے ماہانہ 461 ملین لیٹر فیول استعمال ہونے کا تخمینہ ہے۔مصدق ملک نے کہا کہ سستے فیول پروگرام پر آئی ایم ایف کا اعتراض نہیں بنتا، غریب آدمی کو 100روپے فی لیٹر ریلیف کے پروگرام پر کام ہورہا ہے، فیول کارڈ پر ڈائریکٹ ریلیف اور کوڈ کے ذریعے ریلیف دینے کا جائزہ لیا گیا، کوڈ کے ذریعے فیول کی فراہمی سب سے بہتر سمجھی گئی۔