اسلام آباد(این این آئی)وفاقی شرعی عدالت کے ازخود نوٹس پر بلوچستان میں کم عمری کی شادی کو روکنے کے لیے مسودہ قانون تیار کرلیا گیا ۔تفصیلات کے مطابق چیف جسٹس جسٹس ڈاکٹر سید محمد انور اور جسٹس خادم حسین ایم شیخ، جج پر
مشتمل وفاقی شرعی عدالت کے بنچ نے کیس کی سماعت کی۔ سماعت کے دوران تمام وفاقی اکائیوں کی نمائندگی ان کے متعلقہ لا افسران نے کی۔ صوبہ بلوچستان کی نمائندگی کرنے والے ماہر قانون افسر نے رپورٹ پیش کی کہ انہوں نے “بلوچستان امتناع کم سنی کی شادی ایکٹ 2021 کے عنوان سے ایک بل تیار کیا ہے۔ مجوزہ قانون کا مقصد صوبے میں بچوں کی شادی کو روکنا اور بچوں کے حقوق کا تحفظ کرنا ہے جوکہ وفاقی شرعی عدالت کی جانب سے لیے گئے ازخود نوٹس کے بعد تیار کیا گیا ۔قانون کا مسودہ صوبائی حکومت نے صوبائی کمیشن آن سٹیٹس آف ویمن اور صوبائی محکمہ سماجی بہبود بلوچستان کے ساتھ مشاورت کے بعد تیار کیا ہے جو منظوری کے لیے صوبائی اسمبلی میں پیش کیا جائے گا۔
