لاہور(این این آئی)پاکپتن سے مسلم لیگ (ن) اور قصور سے ایک بڑے سیاسی نام نے تحریک انصاف میں شمولیت اختیار کر لی۔چیئرمین پاکستان تحریک انصاف عمران خان سے پاکپتن سے مسلم لیگ (ن) کے رکن قومی اسمبلی سردار منصب علی ڈوگر اور قصور سے نامور خاتون سیاسی رہنما ناصرہ میو نے ملاقات کر کے تحریک انصاف میں باضابطہ شمولیت کا اعلان کیا۔سردار منصب علی ڈوگر پاکپتن سے مسلم لیگ (ن)کے ٹکٹ پر دو مرتبہ ممبر قومی اسمبلی منتخب ہوئے۔ناصرہ میو ماضی میں پیپلز پارٹی سے منسلک رہیں،اب آزاد حیثیت میں قصور کی سیاست کا ایک قدآور نام ہیں۔دونوں رہنماؤں نے عمران خان کی قیادت اور تحریک انصاف کے منشور پر مکمل اعتماد کا اظہارکرتے ہوئے حقیقی آزادی کی تحریک میں اپنا موثر کردار ادا کرنے کے عزم کا اعادہ کیا۔عمران خان کی جانب سے دونوں رہنماؤں کا پارٹی میں شمولیت پر خیر مقدم کیا گیا۔