لاہور( این این آئی) قومی احتساب بیورو ( نیب) نے سابق خاتون اول بشری بی بی کی قریبی دوست فرح گوگی کے خلاف تحقیقات کا دائرہ کار وسیع کردیا ۔فرح خان کے خلاف آمدن سے زائد اثاثوں، منی لانڈرنگ کیس کی تحقیقات میں صوبہ بھرسے فرح گوگی کے نام جائیدادوں کاریکارڈ طلب کرلیاگیا ہے۔نیب نے فرح خان کی جائیدادوں کا سراغ لگانے کیلئے صوبہ بھرکی ڈویلپمنٹ اتھارٹیز کو مراسلہ جاری کردیا ہے جس میں کہا گیا ہے کہ رہائشی، کمرشل، خریدوفروخت کی جانے والی پراپرٹیز کا ریکارڈ دیا جائے۔فرح خان اور ان کے شوہر احسن جمیل کے نام پر بھی موجود جائیدادوں کا ریکارڈ دیا جائے۔ نیب نے تمام ڈویلپمنٹ اتھارٹی کو 17مارچ تک ریکارڈ جمع کروانے کی ہدایت کردی ہے۔