راجن پور(مانیٹرنگ ڈیسک ،آئی این پی) ضلع راجن پور کے قومی اسمبلی کے حلقہ این اے 193میں ضمنی انتخاب، پاکستان تحریک انصاف کےمحسن لغاری نے میدان مار لیا۔میڈیا رپورٹس کے مطابق تمام 237 حلقوں کے غیر حتمی غیر سرکاری نتائج کے مطابق تحریک انصاف کے
محسن لغاری 90392 ووٹ لے کر پہلے جبکہ ن لیگ کےعمار احمد خان لغاری 55218 کے ساتھ دوسرے اور پاکستان پیپلز پارٹی کے اختر حسن گورچانی 20074 ووٹ کے ساتھ تیسرے نمبر پر رہے۔آر ٹی ایس پر موصول ہونے والے نتائج کے مطابق ووٹنگ ٹرن آؤٹ 41 فیصد رہا۔حلقہ این اے 193میں ضمنی انتخاب کیلئے صبح 8 بجے شروع ہونے والی پولنگ کا عمل شام 5 بجے تک جاری رہا، 3 لاکھ 79 ہزار 204 کے قریب ووٹرز نے حق رائے دہی استعمال کیا،ضمنی الیکشن میں 11امیدواروں کے درمیان مقابلہ ہوا تاہم اصل مقابلہ (ن)لیگ اور پی ٹی آئی کے درمیان ہوا، پی ٹی آئی کے محسن لغاری اور (ن)لیگ کے عمار لغاری میں کانٹے کا مقابلہ دیکھنے میں آیا، پیپلز پارٹی کے اختر حسن گورچانی بھی یہاں سے امیدوار ہیں،الیکشن کمیشن کی جانب سے حلقے میں ووٹنگ کیلئے 237پولنگ سٹیشن قائم کیے گئے جن میں سے 68کو حساس قرار دیا گیا، کسی بھی ناخوشگوار صورتحال سے نمٹنے کیلئے 2 ہزار 650 پولیس اہلکار تعینات کیے گئے تھے، رینجرز اور آرمی کے جوانوں نے بھی گشت کیا،واضح رہے راجن پور کے حلقہ این اے 193کی نشست پاکستان تحریک انصاف کے رکن قومی اسمبلی سردار جعفر لغاری کے انتقال پر خالی ہوئی تھی، اس سے قبل پنجاب حکومت کی جانب سے این اے 193کا ضمنی انتخاب ملتوی کرنے کی درخواست بھی کی گئی تھی۔
