لاہور ( این این آئی )سابق وزیراعلیٰ پنجاب چودھری پرویز الٰہی نے کہا ہے کہ شہباز شریف تاریخ کے نا اہل ترین حکمران ثابت ہورہے ہیں اور مریم نواز بھی انکی نااہلیوں کا بوجھ اٹھانے کو تیار نہیں،(ن) لیگ پنجاب کھو چکی جبکہ عمران خان کے خوف نے حکمرانوں کی نیندیں حرام کردی ہیں۔

سابق وزیر اعلی چودھری پرویز الٰہی سے مسلم لیگ (ق) کے رہنما ساجد احمد خان بھٹی نے ملاقات کی ۔اس موقع پر نادر دوگل ایڈووکیٹ، خبیب بلوچ بھی موجود تھے، ملاقات میں ملکی سیاسی صورتحال اور قانونی معاملات پر مشاورت کی گئی۔اس موقع پر پرویز الٰہی نے کہا کہ اس وقت پاکستان کی سیاست کا ایک ہی اسٹار ہے اور اس کا نام عمران خان ہے، عمران خان کے خوف نے حکمرانوں کی نیندیں حرام کردی ہیں، (ن) لیگ میں سیاسی میدان میں عمران خان کا مقابلہ کرنے کی ہمت نہیں۔انہوں نے کہا کہ پنجاب کا سیاسی میدان بھی عمران خان کے نام ہوچکا ہے، مسلم لیگ (ن) پنجاب کھو چکی ہے، اب (ن) لیگ کا کوئی مستقبل نہیں۔ انہوں نے کہا کہ شہباز شریف تاریخ کے نا اہل ترین حکمران ثابت ہو رہے ہیں۔شہباز شریف کی نااہلیوں کا بوجھ اٹھانے کیلئے مریم نواز بھی تیار نہیں، مریم نواز کی لندن سے واپسی پر ایک مرتبہ پھر لانچنگ بھی ناکام ہو گئی ہے، پی ڈی ایم کی تمام تر کوشش ہے کہ اقتدار سے چمٹی رہے جس کیلئے انہیں آئین شکنی بھی قبول ہے۔ سابق وزیر اعلیٰ نے کہا کہ جیل بھرو تحریک میں گرفتاریاں پیش کرنے کیلئے کارکنوں کا جوش و جذبہ دیدنی ہے۔اوورسیز پاکستانی بھی گرفتاری کیلئے اپنا نام رضاکارانہ پیش کر رہے ہیں، اس وقت پاکستان کی سیاست کا ایک ہی سٹار ہے اور اس کا نام عمران خان ہے۔پرویز الٰہی نے الزام عائد کیا کہ ہمارے حامیوں کو غیر قانونی طور پر اٹھا کر لاپتہ کیا جارہا ہے، حکمرانوں کے انتقامی اقدامات کا ڈٹ کر مقابلہ کریں گے۔