لاہو ر( این این آئی) پاکستان تحریک انصاف کے چیئرمین و سابق وزیر اعظم عمران خان کی زیر صدارت پی ٹی آئی لاہور کے سٹیک ہولڈر کا ویڈیو لنک پر اہم اجلاس ہوا جس میں فوکل پرسن اعجاز چودھری نے شرکاء کو جیل بھرو تحریک کے حوالے سے تفصیلی بریفنگ دی۔اجلاس میں شفقت محمود، شیخ امتیاز محمود، غلام محی الدین دیوان، میاں محمود الرشید، علی امتیاز وڑائچ، مراد راس،

جمشید اقبال چیمہ، میاں محمد اکرم عثمان، رخسانہ نوید، ندیم بارا، روبینہ شاہین، ملک ظہیر عباس کھوکھر، نوشین حامد معراج سمیت دیگر رہنمائوں نے شرکت کی۔اجلاس میں جیل بھرو تحریک کے حوالے سے مختلف کمیٹیاں تشکیل دی گئیں، عمران خان نے لاہور کے تمام سٹیک ہولڈر کو جیل بھرو تحریک کیلئے بھرپور تیاری کرنے، ڈور ٹو ڈور کمپین پر فوکس کرنے اور الیکشن کرا ملک بچائو کے حوالے سے ریلیاں نکالنے کی ہدایت کی، اس موقع پر چیئرمین پی ٹی آئی نے ڈاکٹر یاسمین راشد کی قیادت میں لاہور بھر میں ڈور ٹو ڈور کمپین کو سراہا۔سابق وزیر اعظم عمران خان نے گفتگو کرتے ہوئے کہا کہ امپورٹڈ حکومت کی طرف سے عوام کو مہنگائی کے سمندر میں دھکیلنے پر ہر سطح پر بھرپور آواز بلند کریں گے، حکمران الیکشن سے بھاگ رہے ہیں، آئین شکنی کرنے والوں پر آرٹیکل 6 لگے گا۔اجلاس سے خطاب میں ڈاکٹر یاسمین راشد نے کہا کہ تحریک انصاف بھرپور تیاری کے ساتھ کی جیل بھرو تحریک کا آغاز کرنے جا رہی ہے، تحریک انصاف غریب عوام کو مہنگائی کے سمندر سے نکالنے تک چین سے نہیں بیٹھے گی، لاہور کے تمام سٹیک ہولڈر کا جیل بھرو تحریک میں اہم کردار ہے۔چیئرمین عمران خان کے آج (پیر ) لاہور ہائیکورٹ میں پیش ہونے کے حوالے سے تمام انتظامات مکمل کر لیے گئے۔دوسری جانب پنجاب حکومت کی پاکستان تحریک انصاف کی جیل بھرو تحریک سے متعلق اہم ہدایت سامنے آگئی۔ذرائع کے مطابق پنجاب حکومت کا جیل بھرو تحریک پر مشاورتی اجلاس ہوا، جس میں رضاکارانہ گرفتاری دینے والے کارکنوں کو گرفتار نہ کرنے کی ہدایت کردی۔نگراں وزیراعلی نے چیف سیکریٹری، آئی جی پنجاب و دیگر حکام کے ساتھ اہم اجلاس میں ہدایت کی کہ پی ٹی آئی کارکن اور رہنما قانون کے خلاف جائیں تو گرفتاری کی ہدایت کی۔پنجاب حکومت نے میانوانی اور ڈی جی خان کے جیل حکام کو الرٹ رہنے کی ہدایت کردی۔ حکومت نے امن و امان کی صورتحال کو ہر صورت یقینی بنانے کی ہدایات کردیں۔