اسلام آباد (این این آئی)الیکشن کمیشن نے انتخابات کی تاریخ کے لیے صدر مملکت کی مشاورت کی دعوت کو مسترد کر دیا۔ذرائع کے مطابق پنجاب اور خیبر پختوانخوا (کے پی)اسمبلی کے الیکشن کے معاملے پر سیکرٹری الیکشن کمیشن عمرحمید نے صدر مملکت کو خط لکھا ہے۔

سیکرٹری الیکشن کمیشن عمرحمید کی جانب سے لکھے گئے خط میں کہا گیا کہ پنجاب اور کے پی میں انتخابات کا معاملہ مختلف عدالتی فورمز پر زیر التوا ہے، الیکشن کمیشن ابھی صدارتی آفس سے مشاورت کے عمل میں داخل نہیں ہوسکتا، الیکشن کمیشن اس متعلق پیرکو اجلاس میں فیصلہ کریگا۔خط میں کہا گیا کہ صدر کا دفتر سب سے اعلی آئینی ادارہ ہے، صدر ریاست کے سربراہ ہیں، الیکشن کمیشن صدر مملکت کا احترام کرتا ہے۔خط کے متن کے مطابق سیکرٹری الیکشن کمیشن کے مطابق الیکشن کمیشن اپنی آئینی اور قانونی ذمہ داری سے آگاہ ہے، گورنر خیبرپختونخوا اورپنجاب نے ابھی تک عام انتخابات کی تاریخ نہیں دی،گورنرپنجاب نیکہا کہ وہ معاملے پر لاہور ہائی کورٹ کے فیصلے سے متعلق قانونی راستہ اختیار کریں گے۔ خط میں کہا گیا کہ الیکشن کمیشن نے لاہور ہائی کورٹ سے رہنمائی کے لیے درخواست دائر کی ہے، پشاور ہائی کورٹ میں بھی 3 درخواستیں دائر ہیں، آئین اسمبلی تحلیل پر الیکشن کمیشن کوپولنگ کی تاریخ کا اعلان کرنیکا اختیار نہیں دیتا۔