کابل(آئی این پی)افغان طالبان کی قیادت میں آٹوموبائل بنانے والی مقامی کمپنی اینٹاپ Entopنے ملک میں مقامی سطح پر تیار کردہ پہلی سپر کار Mada9کی نقاب کشائی کر دی،غیر ملکی میڈیا رپورٹس کے مطابق اینٹاپ اور مقامی افغانستان ٹیکنیکل ووکیشنل انسٹی ٹیوٹ (ATVI)کے 30سے زائد انجینئرز کی ایک ٹیم نے نصف دہائی سے زائد عرصے اس ہاتھ سے تیار کردہ گاڑی کو مکمل کرنے کے لئے صرف کر دیے۔
میڈیا رپورٹس کے مطابق اس گاڑی میں استعمال ہونے والا 4سلنڈر انجن وہی طاقت رکھتا ہے جو ٹویوٹا کرولا کی ہوتی ہے،سوشل میڈیا پر وائرل ویڈیو سے معلوم ہوتا ہے کہ اس گاڑی کا انجن پیچھے کی جانب نصب کیا گیا ہے،میڈیا رپورٹس کے مطابق اس گاڑی کی نقاب کشائی طالبان حکومت کے وزیر برائے اعلی تعلیم عبدالباقی حقانی نے اینٹاپ کے صدر دفتر میں کی،اس موقع پر وزیر برائے اعلی تعلیم عبدالباقی حقانی کا کہنا تھا کہ یہ گاڑی طالبان حکومت کی جانب سے عوام کو جدید مذہب کے ساتھ علوم مہیا کرنے کے عزم کا منہ بولتا ثبوت ہے،تاہم اینٹاپ کے سی ای او محمد ریاض احمدی کا کہنا تھا کہ جلد اس گاڑی کو عالمی منڈی میں پیش کیا جائے گا لیکن اس سے قبل ابتدائی طور پر اس گاڑی کو مقامی سطح پر آزمائش کے بعد افغانستان میں فروخت کے لئے پیش کیا جائے گا، تاہم ابھی اس کی لانچ کی تاریخ کا کوئی اعلان نہیں کیا گیا۔
