پشاور (این این آئی)وزیراعلی خیبرپختونخوا نے صوبائی اسمبلی توڑنے کی ایڈوائس گورنر کو بھیج دی۔منگل کو وزیراعلی محمود خان نے تصدیق کی کہ ملکی مفاد میں خیبرپختونخوا اسمبلی توڑنے کا فیصلہ کیا ہے۔وزیراعلی خیبر پختونخوا نے کہا کہ

عام انتخابات میں ملک میں دو تہائی اکثریت سے حکومت قائم کریں گے۔محمود خان نے کہا کہ 48 گھنٹوں میں دستخط نہ کرنے کی صورت میں اسمبلی از خود ٹوٹ جائے گی۔قبل ازیں کابینہ اجلاس سے خطاب کرتے ہوئے انہوں نے کہا کہ ہم تو 23 دسمبر کو اسمبلی تحلیل کررہے تھے، ہمیں تو عمران خان نے روکا۔انہوںنے کہا کہ بے بنیاد اور جھوٹے بیانات سے کچھ نہیں حاصل ہوگا، بتایا جائے عدم اعتماد کے بارے میں ہماری طرف سے کس نے رابطہ کیا؟وزیراعلی خیبر پختونخوا نے کہا کہ عمران خان اس وقت اکیلے کرپٹ مافیا کا مقابلہ کر رہے ہیں، منتیں کرنا تو آپ کا خاصہ ہے، ہم آپ کو الیکشن سے بھاگنے نہیں دیں گے۔انہوں نے کہا کہ آنے والے انتخابات میں آپ کا صفایا کریں گے اور عام انتخابات میں دو تہائی اکثریت سے کامیاب ہوکر لوٹیں گے۔دوسری طرف اپوزیشن لیڈر اکرم درانی نے دعویٰ کیا تھاکہ وزیراعلی نے قریبی ساتھی کے ذریعے عدم اعتماد لانے کا پیغام بھجوایا ہے۔