تل ابیب(این این آئی)اسرائیل میں ساڑھے7ہزار سال پرانے شتر مرغ کے 8انڈے دریافت ہوئے ہیں۔غیر ملکی میڈیا کے مطابق اسرائیلی ماہرین آثار قدیمہ کو صحرائے نقب سے ملنے والے شتر مرغ کے انڈے ثابت حالت میں نہیں بلکہ ان کے چھلکے ہیں،

انڈوں کے یہ چھلکے صحرا میں واقع ایک پرانے آتش دان سے ملے ہیں ۔ماہرین کا کہنا ہے کہ شتر مرغ کے انڈوں کا آتش دان کے قریب ملنا یہ بتاتا ہے کہ انہیں وہاں آباد خانہ بدوشوں نے جمع کیا تھا تاہم اس کا مقصد معلوم کرنے کے لیے لیبارٹری میں تجزیہ کرنا ہوگا جس کے بعد اس حوالے سے مزید معلوم ہوسکے گا۔رپورٹ میں بتایا گیاکہ قدیمی خانہ بدوش شتر مرغ کے انڈے کھانے کے علاوہ انہیں سجاوٹ اور پانی کے برتن کے طور پر رکھنے کے علاوہ مختلف استعمال میں لاتے تھے۔ماہرین آثار قدیمہ کو انڈوں کے قریب سے مٹی کے برتن، جلے ہوئے پتھر اور پتھرکے اوزار بھی ملے ہیں۔ماہرین کے مطابق شتر مرغ کے انڈوں کے چھلکے حیران کن طور پر کافی حد محفوظ حالت میں ہیں، ان کا تجزیہ کرنے سے اس دورکے حوالے سے نئی معلومات ملنے کی امید ہے۔ماہرین کے مطابق اس خطے میں 19ویں صدی تک شتر مرغ عام پائے جاتے تھے تاہم اب وہ معدوم ہوچکے ہیں۔