نیو یارک (این این آئی)برطانوی شاہی خاندان سے علیحدگی اختیار کرنیوالے شہزادہ ہیری کی جانب سے افغانستان میں25افراد کو ہلاک کرنے کے انکشاف کے بعد ان کے ہم شکل کو سیکیورٹی خدشات لاحق ہو گئے۔شہزادہ ہیری کے ہم شکل ریس ویٹک نامی شخص نے کہا کہ

جب میں نے سنا کہ شہزادہ ہیری برطانوی فوج میں گزرے اپنے وقت کے بارے میں بات کر رہے ہیں تو میں بے چین ہونے لگا۔انہوں نے کہا کہ میری والدہ نے مجھے میسج کر کے شہزادہ ہیری کی جانب سے کئے گئے انکشافات کے بارے میں بتایا تو میں کافی گھبرا گیا، میری والدہ نے مجھے خبردار کیا کہ مجھے سیکیورٹی خدشات کی وجہ سے اپنے حلئے کو کچھ تبدیل کرنا ہو گا۔شہزادہ ہیری کے ہم شکل ریس ویٹک نے کہا کہ مجھے کوئی بھی شہزادہ ہیری سمجھ سکتا ہے، اس لئے جب شہزادہ ہیری کو سیکیورٹی خطرات میں اچانک اضافے کا سامنا کرنا پڑا تو میں بھی کافی پریشان ہو گیا ہوں۔ ریس ویٹک نے کہا کہ ماہرین اس بات پر متفق ہیں کہ اس طرح کی معلومات جاری کرنا بہت بڑی غلطی ہے، شہزادہ ہیری نے خود کو اور اپنے خاندان کو غیر ضروری خطرے میں ڈال دیا ہے۔انہوں نے کہا کہ میرے خیال میں شہزادہ ہیری کی کتاب کو سب سے پہلے برطانوی سیکیورٹی سے گزرنا چاہیے تھا لیکن یہ عجیب بات ہے کہ ایسا نہیں کیا گیا، اب مستقبل میں برطانیہ میں کسی بھی بڑی تقریب کے دوران اضافی سیکیورٹی کی ضرورت ہو گی۔