پشاور (این این آئی)وزیر خوراک خیبرپختون خوا عاطف خان نے کہا ہے کہ کے پی کی ضرورت پوری ہونے تک آٹا افغانستان بھیجنے کی اجازت نہیں دیں گے، یوکرین سے ڈھائی لاکھ میٹرک ٹن گندم کے 3شپ آ رہے ہیں، پی ڈی ایم مہنگائی مارچ بھول چکی ، یہ لوگ صرف اپنے کیسز ختم کرنے کے لیے

اقتدار میں آئے ہیں۔پشاور میں میڈیا سے گفتگو کرتے ہوئے وزیرِ خوراک خیبر پختون خوا عاطف خان نے کہا کہ پنجاب حکومت کی جانب سے سبسڈائز آٹا اور گندم ان کے اپنے صوبے کیلئے ہے۔ انہوں نے کہا کہ یوکرین سے ڈھائی لاکھ میٹرک ٹن گندم کے 3شپ آ رہے ہیں، انصاف فوڈ پروگرام بنایا، 10لاکھ خاندانوں کو 2100روپے دینے تھے لیکن وفاق کی جانب سے فنڈز روکنے سے فوڈ پروگرام رکا ہوا ہے۔انہوں نے بتایا کہ پنجاب سے آٹا لانے والوں سے بھتہ وصولی کی اطلاع ملی ہے، اس حوالے سے پنجاب حکومت سے بات کی ہے اور کل بھی بات کروں گا، پنجاب کی اوپن مارکیٹ سے آٹا لینے پر پابندی نہیں، اگر ہے بھی تو بات کریں گے۔انہوں نے کہا کہ پنجاب کا سبسڈی والا آٹا وہاں کے عوام کا حق ہے، پنجاب کا سبسڈی والا آٹا یہاں آئے گا تو وہاں کے عوام کی حق تلفی ہے، غیر معیاری آٹے پر 10ملز کے خلاف کارروائی کر کے گندم کا کوٹہ ختم کیا۔ انہوں نے کہا کہ خیبرپختونخواکی ضرورت پوری ہونے تک آٹا افغانستان بھیجنے کی اجازت نہیں دیں گے۔انہوں نے جنیوا کانفرنس سے ملنے والی امدادی رقم کے اعلان سے متعلق بات کرتے ہوئے کہا کہ عموما اعلان کے برعکس امداد کم ملتی ہے،اللہ کرے 10ارب ڈالرز پورے ہی ملیں، سیلاب سے متعلق امداد میں ہمارا جتنا حصہ بنتا ہے ہم وفاق سے اس کا مطالبہ کریں گے۔انہوں نے کہا کہ پی ڈی ایم مہنگائی مارچ بھول چکی ہے

یہ لوگ صرف اپنے کیسز ختم کرنے کے لیے اقتدار میں آئے ہیں، گورنر پنجاب نے اعتماد کا ووٹ کا کہا ہے، معاملے پر عدالتی فیصلہ بھی موجود ہے، اب اگر پنجاب حکومت سمجھتی ہے کہ اعتماد کا ووٹ لینا ہے تو لیں گے۔ انہوں نے کہاکہ الیکشن ہوں گے تو مکمل مینڈیٹ والی حکومت ہو گی اور ملک میں استحکام ہو گا۔