پشاور(این این آئی)عوامی نیشنل پارٹی خیبر پختونخوا نے صوبے کوانتظامی اور مالی طور پر دیوالیہ کرنے اورجاری ہوشربا مہنگائی کے خلاف احتجاجی مظاہروں کا اعلان کیا ۔ باچا خان مرکز پشاور سے جاری بیان میں کہا گیا ہے کہ عوامی نیشنل پارٹی صوبائی صدر ایمل ولی خان کی

ہدایات کی روشنی میں بدھ11 جنوری کو صوبہ بھر کے ضلعی ہیڈ کوارٹرز میں احتجاجی مظاہرے کرے گی، احتجاجی مظاہروں میں اے این پی اور تمام ذیلی تنظیمیں شرکت کریں گی۔ اس سلسلے میں تمام اضلاع اور متعلقہ ذمہ داران کو ہدایات جاری کردی گئی ہیں۔احتجاجی مظاہروں کا اعلان کرتے ہوئے اے این پی پختونخوا کے صدر ایمل ولی خان نے کہاکہ ہم کل بھی مہنگائی کے خلاف میدان میں تھے اور آج بھی ہے اگر موقف بدلا ہے تو وہ لنگڑے اینڈ کمپنی کا بدلا ہے،ہم عوام سے ہیں اور عوام ہم سے ہیں۔ انہوںنے کہاکہ صوبے کے نااہل حکمرانوں کی بدولت آج عوام دو وقت کی روٹی کیلئے ترس رہے ہیں،صوبائی حکومت عوام کی مشکلات کو فراموش کرکے بنی گالہ کی لڑائی میں مصروف ہیں۔ اے این پی عوام کو ان مشکل حالات میں کبھی اکیلا نہیں چھوڑے گی، احتجاجی مظاہروں میں تاجر تنظیمیں، وکلاء، اساتذہ اور دیگر مکتبہ فکر کے لوگوں سے بھی شرکت کی اپیل کی گئی ہے۔