نیویارک(این این آئی) امریکہ کے معروف رگبی کھلاڑی ڈیمر ہیملن کوایک لیگ میچ کے دوران دل کے دورہ پڑگیا جس سے اس کی حالت نازک ہے۔میڈیا رپورٹ کے مطابق یو ایس نیشنل فٹبال لیگ (این ایف ایل) کے ایک میچ کے دوران بفیلو بلز سے تعلق رکھنے والے

24 سالہ ڈیمر ہیملن سنسناٹی بینگلز سے تعلق رکھنے والے ایک کھلاڑی سے ٹکرانے کے بعد زمین پر گرگئے تھے۔انہیں ہسپتال منتقل کرنے سے قبل 30 منٹ تک میدان میں ہی طبی امداد دی گئی،اس واقعے کے ایک گھنٹے بعد رگبی میچ کو معطل کردیا گیا تھا۔بعد ازاں بفیلو بلز کی جانب سے ایک بیان میں بتایا گیا کہ ڈیمر ہیملن کی حرکت قلب تھم (کارڈک اریسٹ) گئی تھی جسے میدان میں بحال کیا گیا،اس واقعے کے بعد ڈیمر ہیملن کے لیے چند گھنٹوں میں 30 لاکھ ڈالرز کے عطیات جمع کیے گئے۔مخالف کھلاڑی نے ڈیمر ہیملن کو روکنے کے لیے سر سے سینے پر ٹکر ماری تھی جس کے بعد وہ پہلے گھٹنوں کے بل بیٹھ گئے اور پھر زمین پر ڈھیر ہوگئے۔دونوں ٹیموں کے کھلاڑی ڈیمر ہیملن کے گرد جمع ہوگئے جبکہ طبی عملے کی جانب سے ایمرجنسی امداد فراہم کی گئی۔این ایف ایل پلیئرز ایسوسی ایشن کی جانب سے جاری ایک بیان میں کہا گیا کہ ہم دونوں ٹیموں کے کھلاڑیوں سے رابطے میں ہیں اور اس وقت بس ڈیمر ہیملن کی صحت ہی اہمیت رکھتی ہے۔