اسلام آباد (این این آئی)بیرون ملک دوروں کا معاملہ، وزیر خارجہ بلاول بھٹو زرداری نے تفصیلات سامنے رکھ دیں۔ جاری اعلامیہ کے مطابق وزیر خارجہ نے کہاکہ میں پاکستان کا واحد وزیر خارجہ ہوں جو اپنا ٹکٹ خریدتا ہے اور اپنے ہوٹل کا بل خود ادا کرتا ہے۔ انہوںنے کہاکہ میں اپنے بیرون ملک دوروں کے

اخراجات کا بوجھ قومی خزانے پر نہیں ڈالتا اور اگر ایسا کرتا بھی تو بطور وزیر خارجہ یہ میرا استحقاق ہے۔ وزیر خارجہ بلاول بھٹو زرداری نے اپنے بیرون ملک دوروں سے متعلق سوال پر ردعمل کا اظہار کرتے ہوئے کہاکہ میں وزیر داخلہ نہیں بلکہ وزیر خارجہ ہوں، میرے بیرون ملک دوروں کا فائدہ میری ذات کو نہیں بلکہ پاکستان کے عوام کو ہوا ہے۔ انہوںنے کہاکہ دیگر لوگ شاید چھٹی منانے بیرون ملک دوروں پر جاتے ہیں مگر میری محنت کی وجہ سے پاکستان فیٹف کی گرے لسٹ سے نکل گیا۔وزیر خارجہ بلاول بھٹو زرداری نے کہاکہ میرے بیرون ملک دوروں کی وجہ سے پاکستان کو معاشی فوائد حاصل ہوئے، پاکستان اس وقت جی 77 یعنی پوری دنیا کے ترقی پذیر ممالک کے اتحاد کی قیادت کررہا ہے۔ وزیر خارجہ نے کہاکہ ہم نے کوپ 27 میں تباہی سے ازالے کو ایجنڈے میں شامل کروایا اور یہ پاکستان سمیت تمام ترقی پذیر ممالک کی ایک بڑی کامیابی ہے۔ وزیر خارجہ بلاول بھٹو زرداری نے کہاکہ آپ ہماری جی 77 اصلاحات کی دستاویز کو ملاحظہ کریں، دنیا کے تمام ترقی پذیر ممالک نے مطالبہ کیا ہے کہ عالمی فنانشل ادارے امیر ممالک کے بجائے غریب ممالک کو فائدہ دیں۔

موضوعات:بلاول بھٹو