کراچی(این این آئی) سندھ حکومت نے صوبے میں 26 دسمبر کو جزوی جبکہ 27 دسمبر کو عام تعطیل کا اعلان کردیا۔چیف سیکریٹری سندھ سہیل راجپوت کی جانب سے صوبے میں جزوی اور عام تعطیل کا نوٹیفکیشن جاری کردیا گیاہے۔نوٹیفکیشن کے مطابق

26 دسمبر کو مسیحی برادری سے تعلق رکھنے والے سرکاری ملازمین کی چھٹی ہوگی۔ یہ چھٹی کرسمس کے سلسلے میں دی جائے گی۔ سابق وزیراعظم بے نظیر بھٹو کی برسی کے موقع پر 27 دسمبر کو صوبے میں عام تعطیل ہوگی۔نوٹیفکیشن میں مزید کہا گیا ہے کہ 26 دسمبر کی جزوی اور27 دسمبر کی صوبائی تعطیل کا اطلاق لازمی سروسز، کووڈ کی ایمرجنسی ڈیوٹی اور سیلاب زدگان کی بحالی کے کاموں میں شامل ملازمین پر نہیں ہوگا۔27 دسمبر 2007 کو راولپنڈی میں سابق وزیر اعظم اور پاکستان پیپلز پارٹی کی چیئرپرسن بے نظیر بھٹو دہشتگردی کے واقعے میں جاں بحق ہوگئی تھی۔اسی مناسبت سے ہر سال پیپلز پارٹی کی حکومت صوبے میں تعطیل کا اعلان کرتی ہے۔بے نظیر بھٹو کی برسی کی مرکزی تقریب نوڈیرو کے گائوں گڑھی خدا بخش میں ہوتی ہے۔ جس میں پیپلز پارٹی کے چیئرمین بلاول بھٹو زرداری اور آصف علی زرداری سمیت ان کے اہل خانہ اور پارٹی کے رہنما اور کارکن شرکت کرتے ہیں۔