اسلام آباد(مانیٹرنگ ڈیسک)وزیراعلیٰ پنجاب کے بیان پر عمران خان کو اعتماد میں لینے کے لیے مونس الہی ان کی رہائش گاہ پہنچ گئے اور ملاقات کرکے اپنے تعاون کی یقین دہانی کرائی۔نجی ٹی وی ایکسپریس نیوز کے مطابق ایک روز قبل عمران خان نے پنجاب اور
خیبر پختون خوا کے وزرائے اعلیٰ کے ہمراہ پریس کانفرنس کرتے ہوئے سابق آرمی چیف جنرل (ر) قمر جاوید باجوہ پر ایک بار پھر تنقید کی تھی جس پر آج وزیراعلیٰ پنجاب چوہدری پرویز الہٰی نے عمران خان کے بیان کو احسان فراموشی قرار دیتے ہوئے بیان دیا ہے کہ آئندہ جنرل (ر) باجوہ کے خلاف کوئی بات کی گئی تو ہماری پوری جماعت بھی جواب دے گی۔پرویز الہیٰ کے اس بیان کے بعد پیدا شدہ کشیدہ صورتحال کو ختم کرنے کے لیے چوہدری مونس الہی عمران خان سے ملاقات کے لیے ان کی لاہور رہائش گاہ زمان پارک پہنچے۔ عمران خان سے ملاقات کے دوران پی ٹی آئی رہنما فواد چوہدری بھی موجود تھے۔ملاقات میں وزیراعلیٰ پنجاب کے بیان کے حوالے سے بات چیت کی گئی، مونس الہی نے پرویز الہی کے بیان کے حوالے سے اپنے موقف سے آگاہ کیا اور پرویز الہی کے بیانات پر اعتماد میں لیا۔ذرائع کا کہنا ہے کہ ملاقات بیس منٹ تک جاری رہی جس کے بعد مونس الہٰی زمان پارک سے روانہ ہوگئے۔
