اسلام آباد(این این آئی)عوامی مسلم لیگ کے سربراہ و سابق وفاقی وزیر داخلہ شیخ رشید احمد نے کہا ہے کہ یقین ہے جو بھی نیا آرمی چیف آئے گا وہ سیاسی گند نہیں اٹھائے گا،ملکی استحکام میں اداروں کا اہم کردار ہے ،وہ یہ کردار خاموشی سے بھی ادا کرسکتے ہیں،ہوسکتا ہے عمران خان راولپنڈی میں جلسہ دن کی روشنی میں ختم کر دیں،سیاست دانوں کو ملک کا سوچنا چاہئے ۔
نجی ٹی وی سے گفتگو کرتے ہوئے سابق وزیر داخلہ شیخ رشید احمد نے کہا کہ ملکی استحکام میں اداروں کا اہم کردار ہے اور وہ یہ کردار خاموشی سے بھی ادا کرسکتے ہیں، اداروں کو اپنا سمجھتا ہوں لیکن سیاست میں عمران خان کے ساتھ کررہا ہوں۔انہوں نے کہا کہ عمران خان نے کچھ دن پہلے کہا اہم تعیناتی سے کوئی تعلق نہیں ہے تو میں نے ان سے کہا کہ یہ بیان پہلے دے دیتے تو اچھا ہوتا۔ انہوں نے کہا کہ یقین ہے جو بھی نیا آرمی چیف آئے گا وہ سیاسی گند نہیں اٹھائے گا۔شیخ رشید نے کہا کہ مجھے عمران خان نے بتایا ہے کہ نگران حکومت کی زیادہ مدت کے آپشن کو مسترد کردیا ہے، مجھے نہیں معلوم عمران خان راولپنڈی آنے کے بعد کیا کریں گے مگر اسے مزید چوک چوراہے میں رہنا پڑے تو وہ رہ لیں گے، ہوسکتا ہے وہ راولپنڈی میں جلسہ دن کی روشنی میں ختم کریں۔ایک سوال کے جواب میں انہوں نے کہا کہ پاکستان میں سیاسی عدم استحکام شدت سے بڑھ گیا ہے جس کی وجہ سے معاشی طور پر بہت نقصان ہورہا ہے، ملک ہم سب کا ہے معیشت کیلئے سب کو پھر کام کرنا ہوگا۔سابق وزیر داخلہ نے کہا کہ وزیردفاع، وزیرداخلہ جیسے بیانات دے رہے ہیں عہدوں کی اہمیت کوسمجھیں، دنیا سیاست دان کے بیان کو دیکھتی ہے اور اپنی رائے قائم کرتی ہے ملک ہے تو ہم ہیں، سب سیاست دانوں کو ملک کا سوچنا چاہیے۔انہوں نے کہا کہ عمران خان کی جان لینے کی سازش ناکام ہوئی، عظیم صحافی ارشد شریف کو سازش کے تحت قتل کیا گیا، میری دعا اور امید بھی ہے کہ ملکی بہتری کے لیے فیصلے ہوں گے۔
