لاہور ( این این آئی) پاکستان تحریک انصاف کے چیئرمین عمران خان پر ضلع وزیر آباد میں لانگ مارچ کے دوران ہونے والے قاتلانہ حملے کی تحقیقات کیلئے بنائی گئی 5 رکنی مشترکہ تحقیقاتی ٹیم نے بلآخر کام شروع کر دیا ، ٹیم کے سربراہ سی سی پی او لاہور غلام محمود ڈوگر نے کہا ہے کہ وزیر آباد حملے کی تحقیقات میرٹ پر ہوگی ،تمام قانونی تقاضے پورے ہونگے اور ذمہ داروں کو کٹہرے میں لائیں گے ،
دوسری جانب اے آئی جی انکوائریز نے بھی مرکزی ملزم نوید کی ویڈیو لیک معاملے کی تحقیقات میں پیشرفت کرتے ہوئے تمام افسران کو8 نقاطی سوالنامہ فراہم کر دیئے ۔ تفصیلات کے مطابق پنجاب حکومت کی جانب سے وزیر آباد واقعے کی تحقیقات کے لئے جوائنٹ انویسٹی گیشن ٹیم کے سربراہ کو تیسری بار تبدیل کرتے ہوئے سی سی پی او لاہور غلام محمود ڈوگر کو کنوینئر مقرر کیا ہے ۔جبکہ دیگر ارکان میں ڈیرہ غازی خان کے ریجنل پولیس افسر سید خرم علی، اے آئی جی مانیٹرنگ احسان اللہ چوہان، سپرٹنڈنٹ آف پولیس (ایس پی)پوٹھوہار ڈویژن راولپنڈی ملک طارق محبوب اور محکمہ انسداد دہشت گردی (سی ٹی ڈی)پنجاب کے ایس پی لاہور نصیب اللہ خان شامل ہیں۔اس سے قبل پہلی جے آئی ٹی کی سربراہی ڈی آئی جی (اسٹیبلشمنٹ II) اور سی پی او لاہور طارق رستم چوہان کر رہے تھے تاہم پنجاب حکومت نے 5رکنی مشترکہ تحقیقاتی ٹیم کی 24 گھنٹے کے اندر ہی تشکیل نو کردی اور دوسری جے آئی ٹی کے سربراہ ڈی آر پی او ڈیرہ غازی خان سید خرم علی تھے۔اس حوالے سے جے آئی ٹی کے سربراہ سی سی پی او لاہور غلام محمود ڈوگر نے کہا کہ مشترکہ تحقیقاتی ٹیم نے کام شروع کردیا ہے ۔ واقعے کی تحقیقات صرف اور صرف میرٹ پر ہوگی اور تمام قانونی تقاضے پورے ہونگے ۔انہوں نے کہا کہ واقعے کے مختلف پہلوئوں کو سامنے رکھ کر تفتیش شروع کی ہے ،
حملے میں ملوث ذمہ داروں کو کٹہرے میں لائیں گے ۔دوسری جانب آئی جی پنجاب کے حکم پر اے آئی جی انکوئریز نے فائرنگ کرنے والے ملزم نوید کی ویڈیو لیک ہونے کے معاملے پر بھی تحقیقات پر پیشرفت کرتے ہوئے وزیرآباد جائے وقوعہ اور تھانے کا دورہ کیا ۔ انہوں نے ویڈیو لیک کے حوالے سے تھانے کا دورہ کیا اور ارپی اوگجرات ،ڈی پی او وزیر آباد اور ایس ایچ او سے ملاقات بھی کی۔
انہوں نے انکوائری کے لئے چوہنگ سی ٹی ڈی آفس کا دورہ بھی کیا۔تمام افسران کو8نقاطی سوالنامہ فراہم کر دیئے گئے ۔پولیس حکام کے مطابق فائرنگ 4بج کر7منٹ جبکہ ملزم نوید کو 4بج کر12 منٹس پر پولیس نے قریبی کباڑ خانے سے پکڑا،ملزم کو 4بج کر53منٹ پرمتعلقہ تھانہ ایس ایچ او شہباز ہنجرا کی سربراہی میں تھانے منتقل کیا گیا،ملزم نوید کو ایس ایچ او کے کمرے میں منتقل کیا گیا ۔
4بج کر53منٹ سے ساڑھے 6بجے تک کی تھانے کے کیمروں کی ویڈیو حاصل کرلی گئی ہے ، ویڈیو شواہد کے ذریعے تعین کیا جائیگا کہ ویڈیو کس کے موبائل سے بنائی گئی۔ویڈیو کس کس کو بھجوائی گئی اس سے بھی پوچھ گچھ کی جائے گی۔ساڑھے 6بجے کے قریب سی ٹی ڈی افسران ملزم کو تھانے سے لیکرلاہور روانہ ہوگئے۔وزیر آباد اور سی ٹی ڈی سے متعلقہ چھوٹے اور اعلیٰ افسران کواگلے 2روز میں سی پی او آفس بلا یا جائیگا ۔
