اسلام آباد (مانیٹرنگ ڈیسک /این این آئی)وزیرخزانہ اسحاق ڈار آرمی چیف جنرل قمرجاوید باجوہ سے صلح سے متعلق صحافی کے سوال کا جواب دیئے بغیر چلے گئے ۔جنگ اخبارکے مطابق  پارلیمنٹ میں میڈیا سے غیررسمی گفتگوکے دوران ایک صحافی نے اسحاق ڈارسے سوال کیاکہ کیاآپ کی آرمی چیف سے صلح ہوگئی ہے ؟

جس پر اسحاق ڈار نے کوئی جواب نہیں دیااور وہاں سے چلے گئے ۔علاوہ ازیں سینیٹ میں حلف برداری کی تقریب کے بعد صحافیوں سے غیر رسمی گفتگو کرتے ہوئے سینیٹر اسحاق ڈار نے کہا کہ عمران خان انتظار کریں کہ وہ میرا راستہ روکیں گے یا میں انکا روکوں گا۔انہوں نے پی ٹی آئی چیئرمین کو خبردار کرتے ہوئے کہا کہ اب عمران خان مجھ سے بچیں۔قبل ازیں نامزد وزیر خزانہ سینیٹر اسحق ڈار نے کہاہے کہ چوبیس گھنٹے میں روپے کی قدر بہتر ہونے کی وجہ سے پاکستان کے قرضوں میں 1350ارب کی کمی آچکی ہے،مہنگائی بہت بڑھ گئی ہے، یوٹیلیٹی پرائسز بہت بڑا چیلنج ہیں، صورتحال بہتر کر نے کی پوری کوشش کریں گے، ماضی میں اللہ نے کامیابی دی ہے،ہنڈی والے پاکستانی روپے کو یرغمال نہیں بنا سکتے، نہ ماضی میں پاکستانی روپے کو یرغمال بننے دیا نہ آئندہ بننے دیں گے،پی ٹی آئی کا احتجاج پارلیمانی نظام کا حصہ ہے، کوئی بات نہیں، میں عوام سے محبت کرتا ہوں اور عوام مجھ سے محبت کرتے ہیں۔