اسلام آباد(این این آئی) عوامی نیشنل پارٹی کے مرکزی صدر اسفندیار ولی خان نے کہا ہے کہ ریاست پاکستان کی جانب سے یوکرائن کو اسلحے فراہم کرنے کی خبریں خطرناک ہیں۔ اگر یہ خبریں سچ پر مبنی ہیں تو اس کے نتائج خطرناک ہوں گیاور اسکیبرے اثرات پورے پاکستان کے عوام پر پڑیں گے۔ باچا خان مرکز پشاور سے جاری
بیان میں اے این پی سربراہ اسفندیار ولی خان کا کہناتھا کہ پرائی جنگوں میں کودنا ہمیشہ خطرناک نتائج لے کر آتا ہے۔پچاس سال قبل جن غلط پالیسیوں کو بنیاد بنا کر ہم جس پرائی جنگ کا حصہ بنے تھے اسکے ثمرات آج تک بھگت رہے ہیں۔انہی غلط فیصلوں کی بدولت پختون خطے میں آج تک خون کی ہولی کھیلی جارہی ہے۔ پاکستان اور عوام کے بہتر مفاد میں ماضی کی غلطیوں سے سیکھنا ہوگا۔ ان کا مزید کہنا تھا کہ اے این پی کے شروع ہی سے موقف ہے کہ تمام پڑوسی ممالک کے ساتھ بہتر اور برادرانہ تعلقات میں ہی ہماری بقا ہے۔ تعلقات بہتر ہوں گے تو آزادانہ تجارت اور آمدورفت کی راہ میں رکاوٹیں نہیں ہونگی۔ کاروبار، تجارت اور روزگار کے مواقع پیدا ہونگے، جس سے معیشت مستحکم ہو گی۔ ایمل ولی خان کا کہنا تھا کہ اے این پی نے ہمیشہ امن کیلئے کوششیں کیں ہیں اور آج بھی ہر قسم کا کردار ادا کرنے کیلئے تیار ہیں۔ بطور ریاست پاکستان اگر مصالحت کیلئے کردار ادا نہیں کرسکتا تو فریق بننے سے گریز کرے۔ اس طرح کے اقدامات اگر ایک طرف بین الاقوامی سطح پر ملک کی بدنامی کا باعث بن رہے ہیں تو دوسری جانب ملک کے اندر بھی مشکلات میں اضافہ کررہے ہیں۔ ابھی بھی وقت ہے، چند لوگوں کے ذاتی مفاد کی بجائے ملکی مفاد کو سامنے رکھ کر کردار آگے بڑھنا ہوگا۔
