اسلام آباد (این این آئی) وفاقی وزیر میاں جاوید لطیف نے کہاہے کہ حضرت عمر کی مثالیں دینے والا کہہ رہاہے میں اپنی چوری اور فنڈنگ کے متعلق جواب دینے کا پابند نہیں ۔ اپنے بیان میں وفاقی وزیر نے کہاکہ ریاست مدینہ کے قیام کا دعویدار اور حضرت عمر کی مثالیں دینے

والا ایف آئی اے کو کہہ رہا ہے کہ میں اپنی چوری اور فنڈنگ کے متعلق جواب دینے کا پابند نہیں ہوں۔ میاں جاوید لطیف نے کہاکہ عمران الٹا ایف آئی اے حکام کے خلاف کارروائی کی دھمکیاں دے کر بدمعاشی کی کوشش کررہا ہے۔انہوں نے کہاکہ یہ شخص کسی غلط فہمی میں نہ رہے، قانون اپنا راستہ لے گا۔ دوسری جانب پاکستان تحریک انصاف کے رہنما فرخ حبیب نے کہا ہے کہ عمران خان کے 9 حلقوں سے ایک ہی طرح کے کاغذات نامزدگی جمع کروائے گئے۔اپنے بیان میں انہوں نے کہا کہ 8 حلقوں سے کاغذات منظور ہوگئے، آر او فیصل آباد نے بلاجواز کاغذات مسترد کر دیے، فیصلے کو چیلنج کریں گے۔فرخ حبیب نے کہا کہ آر او نے پہلے عمران خان کو ذاتی حیثیت میں طلب کیاتھا، آٹھ حلقوں سے کاغذات مسترد نہیں ہوئے انھوں نے کردیے۔واضح رہے کہ قومی اسمبلی کے حلقہ این اے 108 سے چیئرمین تحریک انصاف عمران خان کے کاغذات نامزدگی مسترد کردیے گئے ہیں۔ضلعی الیکشن کمشنر کا کہنا ہے کہ عمران خان نے اثاثہ جات سے متعلق اعتراضات کا تسلی بخش جواب نہ دیا جس پر ان کے کاغذات نامزدگی مسترد کیے گئے۔