لاہور (آن لائن) پاکستان تحریک انصاف کے چیئرمین اور نگران وزیراعظم عمران خان کی اہلیہ بشریٰ بی بی کی قریبی سہیلی فرح خان کا گائوں گھنگ ایک سپیشل گائوں کے طور
پر سامنے آیا ہے۔ بتایا گیا ہے کہ ایوان وزیراعلیٰ پنجاب نے سابقہ خاتون اوّل کی مبینہ سفارش پر اس گائوں کے لئے 11 کروڑ 95 لاکھ روپے کے فنڈز جاری کئے جو پنجاب کے گائوں میں سب سے زیادہ فنڈ لینے والا گائوں شمار کیا جاتا ہے یہ بھی بتایا گیا ہے کہ پاکستان سے دبئی فرار ہونے والی فرح خان جو خاتون اوّل بشریٰ بی بی کی سہیلی ہے کی سفارش پر پنجاب حکومت گزشتہ 3 سال کے دوران صرف شیخوپورہ کے لئے 45 ارب روپے جاری کرچکی ہے یہ بھی بتایا گیا ہے کہ 11 کروڑ 90 لاکھ روپے کی لاگت سے گھنگ گائوں میں فیملی پارک کی تعمیر سیوریج کے نظام کی بحالی اور سڑکوں کی تعمیر سمیت دوسرے منصوبہ جات کو شامل کیا گیا ہے۔ جاری کئے گئے فنڈز سے گائوں میں ایک سٹیڈیم بھی تعمیر کیا جائے گا۔ یہ بھی بتایا گیا ہے کہ فرح خان نے اپنی سہیلی کے اختیارات کا فائدہ اٹھاتے ہوئے کروڑوں روپے کے ٹھیکے اپنے من پسند افراد کو بھی جاری کئے تھے۔
