فیصل آباد (آن لائن )امیر جماعت اسلامی پاکستان مولانا سراج الحق نے کہا ہے کہ موجودہ حکومت نے ملک کی معیشت کا بیڑہ غرق کر دیا ہے اور ملک کو 50ہزار ارب کا مقروض بنا دیا ہے، مسلم لیگ (ن)، پیپلزپارٹی اور پی ٹی آئی اپنے اپنے مفادات کی جنگ لڑ رہے ہیں ان کو ملک اور عوام کا کوئی خیال نہیں ہے،
ملک کو صورتحال سے نکالنے کیلئے سودی نظام کا خاتمہ کر کے اسلامی نظام کے نفاذ سے ممکن ہے۔ ان خیالات کا اظہار انہوں نے فیصل آباد صنعتکاروں اور تاجروںمیں ایک تقریب سے خطاب کرتے ہوئے کیا۔ اس موقع پر صوبائی امیر جماعت اسلامی جاوید قصوری، جماعت اسلامی فیصل آباد کے امیر محبوب الزماں بٹ، امیر جماعت اسلامی سیاسی امور طاہر ایوب، سابق امیر سردار ظفر حسین، سپریم انجمن تاجران کے صدراسلم بھلی، کے علاوہ تاجروں، صنعتکاروں اور عمائدین شہر کی کثیر تعداد موجود تھی۔ سراج الحق نے مزید کہا کہ موجودہ حکومت نے ملکی معیشت کو تباہی کے دہانے پر پہنچ دیا ہے۔ موجودہ حکومت کی ناقص پالیسیوں کی وجہ سے ملک کا عدالتی، سیاسی، تعلیمی، معاشی نظام تباہی کی طرف جا رہا ہے اور پاکستان زرعی ملک ہونے کے باوجود زرعی زمینوں پر رہائشی کالونیاں بنائی جا رہی ہیں اور ہر محکمہ میں کرپشن اپنی انتہا کو پہنچ چکی ہے۔ کوئی کام رشوت اور سفارش کے بغیر نہیں چلتا اور کلمہ کی بنیاد پر حاصل ہونیوالے وطن عزیز کو تباہ کیا جا رہا ہے اور ملک کو آئی ایم ایف کے پاس گروی رکھ دیا ہے۔ ان حالات سے ملک کو نکالنے کے لیے سودی نظام کا خاتمہ کر کے نظام مصطفی کا نظام نافذ کرنا ہو گا۔
