واشنگٹن(این این آئی)امریکہ میں 2019سے لاپتہ چارسالہ بچی کو بازیاب کرا لیا گیا، والدین ہی بچی کے اغواکار ثابت ہوئے،میڈیارپورٹس کے مطابق نیویارک پولیس نے ایک گھر کی سیڑھیوں کے نیچے بنے خفیہ کمرے سے بچی کوصحیح سلامت بازیاب کرلیا، پولیس نے بتایا کہ بچی
کے اغواکار خود اس کے والدین تھے جنہیں گرفتار کرلیا گیا ہے ، جبکہ جرم میں بچی کے دادا بھی شامل ہیں۔پیسلی شلٹس نامی بچی کی عمر اب چھ برس ہو چکی ہے، اور اب اسے اس کے قانونی سرپرست یعنی بڑی بہن کے حوالے کر دیا گیا ۔بچی کو کچھ وجوہات کی بنا پر والدین سے لینے کا فیصلہ کیا گیا تھا، جس کے بعد سے لاپتہ ہو گئی، اس کی گمشدگی کی رپورٹ بھی 2019 میں لکھائی گئی، لیکن بازیاب نہیں کرایا جا سکا۔حالیہ عرصے میں پولیس کو اطلاع ملی کہ پیسلی کو ساگیٹیز کے قصبے میں ہی کسی خفیہ مقام پر چھپایا گیا ہیتو پولیس دوبارہ اسی مقام پر پہنچی جہاں وہ پہلے بھی کئی بار تفتیش کر چکی تھی۔ایک گھنٹے کی سرچ کے بعد ایک پولیس اہلکار کو محسوس ہوا، کہ گھر کی بیسمنٹ بھی موجود ہے جس کی سیڑھیاں نظر نہیں آرہیں، پولیس نے کئی لکڑی کے تختے ہٹانے کے بعد پیسلی کو ڈھونڈ نکالا۔مِس کوپر اور مسٹر شلٹس جونیئر اور ان کے والد مسٹر شلٹس سینیئر کو پیسلی کو اغوا کرنے کے الزام میں حراست میں لے لیا گیا۔
