اسلام آباد(آن لائن)کپتان کی ایک اور وکٹ گر گئی۔الیکشن کمیشن آف پاکستان نے دوہری شہریت کیس میں پی ٹی آئی کے سینیٹر اور سابق وزیر برائے آبی وسائل فیصل واڈا کو نا اہل قرار دے دیا۔فیصل واڈا نے 2018 کے عام انتخابات میں کراچی سے قومی اسمبلی کی نشست پر الیکشن
لڑتے ہوئے اپنی دوہری شہریت کو مبینہ طور پر چھپایا تھا۔الیکشن کمیشن نے فیصل واڈا کو ہدایت کی ہے کہ بطور ایم این اے حاصل کی گئی تنخواہ اور مراعات بھی واپس کریں۔الیکشن کمیشن نے فیصل واڈا کے بطور سینیٹر منتخب ہونے کا نوٹیفکیشن بھی واپس لے لیا۔ فیصلے میں الیکشن کمیشن کی جانب سے کہا گیا کہ فیصل واڈا نے جھوٹا بیان حلفی جمع کروایا تھا، بطور رکن قومی اسمبلی سینیٹ الیکشن میں دیا گیا ووٹ بھی غلط کاسٹ کیا گیا۔فیصل واوڈا فیصلے کو سپریم کورٹ میں فیصلے کو چیلنج کرسکتے ہیں،یاد رہے ای سی پی نے فیصل واڈا کے خلاف دوہری شہریت پر نااہلی کی درخواست کا فیصلہ 23 دسمبر 2021 کو محفوظ کیا گیا تھا۔علاوہ ازیں پاکستان تحریک انصاف کے رہنما و سابق وزیر آبی وسائل فیصل واوڈا نے وزیر اعظم عمران خان سے رابطہ کر کے الیکشن کمیشن کے فیصلے سے انھیں آگاہ کیا۔ الیکشن کمیشن کے فیصلے کو چیلنج کرنے کے حوالے سے فیصل واوڈا نے وزیر اعظم سے مشاورت کی ْ۔ذرائع کا کہنا ہے کہ فیصل واوڈا جلد وکلا سے مشاورت کے بعد فیصلے کو چیلنج کرینگے۔ فیصل واوڈا نے الیکشن کمیشن سے فیصلے کی کاپی حاصل کرنے کیلئے رجوع کرلیا۔
