راولپنڈی(مانیٹرنگ ڈیسک ، این این آئی)پنجگور اور نوشکی میں سکیورٹی فورسز پر حملے کے نتیجے میں جام شہادت نوش کرنے والے کیپٹن ڈاکٹر بلال خلیل نے اپنے انسٹاگرام پر شہادت سے محض 7 گھنٹے قبل ایک سٹوری شیئر کی تھی جو تیزی سے وائر ل ہورہی ہے۔جنگ نیوز کے مطابق شہادت سے 7 گھنٹے قبل شیئر کی جانے والی سٹوری میں انہوں نے لکھا

تھا کہ درود شریف پڑھیں اور اسے شیئر کریں تاکہ تمام اجر آپ کا ہو۔شہید بلال خلیل کے دوست بھی ان کے ساتھ گزارے گئے یادگار لمحوں کو سوشل میڈیا پر شیئر کر رہے ہیں۔ایک صارف کہتے ہیں کہ خبر ملی کہ کیپٹن ڈاکٹر بلال خلیل شہید ہوگئے ہیں۔ابھی تک یقین نہیں آرہا۔آج سے کم و بیش 6 سال پہلے میرا داخلہ غازی خان میڈیکل کالج میں ہوا تو اس وقت یہ وہاں دوسرے سال میں تھے۔انہوں نے ہمارے ٹیسٹوں کی تیاری کروائی۔ہمیں ریگنگ سے بچاتے رہے۔نماز کی تلقین کرتے رہے۔ایک صارف نے کہا کہ کیپٹن ڈاکٹر بلال خلیل میرے سینئر تھے جنہوں نے دہشتگردوں کے ساتھ لڑتے ہوئے جام شہادت نوش کیا۔ اب بھی یقین نہیں آتا کہ وہ چلا گیا ہے،وہ ایک عظیم شخص تھا۔اللہ تعالی جنت میں اعلیٰ مقام عطا فرمائے۔دوسری جانب پاک فوج کے شعبہ تعلقات عامہ آئی ایس پی آر نے کہا ہے کہ نوشکی اور پنجگور میں سکیورٹی فورسز کے آپریشن کے دوران 13 دہشت گرد ہلاک ہوئے۔آئی ایس پی آر کے مطابق گزشتہ رات دہشت گرد حملے

پسپا کرنے کے بعد سکیورٹی فورسز نے کلیئرنس آپریشن کیا، کلیئرنس آپریشن مفرور دہشت گردوں کی تلاش کے لیے تھا۔شعبہ تعلقات عامہ کے جاری بیان کے مطابق پنجگور میں اب تک 4 دہشت گرد مارے جا چکے ہیں اور دہشت گردوں کے خاتمے کیلئے سکیورٹی فورسز کا آپریشن جاری ہے، 4 سے 5 دہشت گردوں کے خلاف گھیرا تنگ کر لیا ہے۔

آئی ایس پی آر کے مطابق پنجگور میں شدید فائرنگ کے دوران پاک فوج کے 3 جوانوں نے جام شہادت نوش کیا اور 4 فوجی زخمی ہیں۔پاک فوج کے شعبہ تعلقات عامہ کے مطابق نوشکی میں مجموعی طور پر 9 دہشت گرد مارے گئے اور دہشت گردوں کا حملہ پسپا کرتے ہوئے پاک فوج کے 4 جوانوں نے جام شہادت نوش کیا۔آئی ایس پی آر کے مطابق ابتدائی تحقیقات میں یہ بات سامنے آئی ہے کہ دہشت گرد اور ان کے ہینڈلرز بھارت اور افغانستان میں رابطے میں تھے۔