اسلام آباد (نیوز ڈیسک)امریکی صدر ڈونلڈ ٹرمپ کا کہنا ہے کہ انہوں نے وینزویلا کے صدر نکولس مادورو کی گرفتاری کا منظر براہِ راست ایک ٹی وی پروگرام کی طرح دیکھا۔امریکی نشریاتی ادارے کو دیے گئے انٹرویو میں صدر ٹرمپ نے بتایا کہ مادورو کی گرفتاری کی ویڈیو انہوں نے فلوریڈا میں فوجی اعلیٰ حکام کے ساتھ مل کر دیکھی۔ ان کے مطابق امریکی بحری جہاز مادورو کو لے کر نیویارک کی جانب روانہ ہے، جہاں ان پر مین ہیٹن کی عدالت میں منشیات اور اسلحے کی اسمگلنگ سے متعلق مقدمات چلائے جائیں گے۔

ٹرمپ نے مزید کہا کہ مادورو کے خلاف کارروائی کی خفیہ منصوبہ بندی دسمبر کے آغاز سے جاری تھی، تاہم وینزویلا میں آئندہ اقتدار کس کے ہاتھ میں آئے گا، اس کا فیصلہ ابھی باقی ہے۔امریکی صدر کے مطابق اس آپریشن کے دوران ایک ہیلی کاپٹر حادثے کا شکار ہوا، جس کے نتیجے میں چند امریکی اہلکار زخمی بھی ہوئے۔دوسری جانب امریکی میڈیا رپورٹس میں دعویٰ کیا گیا ہے کہ نکولس مادورو اور ان کی اہلیہ سیلیا فلوریس کو امریکی فورسز نے ان کے بیڈروم سے حراست میں لیا۔واضح رہے کہ امریکا نے وینزویلا میں فوجی کارروائی کرتے ہوئے صدر مادورو اور ان کی اہلیہ کو گرفتار کیا۔ یہ آپریشن امریکی جنگی طیاروں اور خصوصی یونٹ ڈیلٹا فورس کی جانب سے دارالحکومت کاراکس میں انجام دیا گیا۔وینزویلا کی حکومت نے ان حملوں کو کھلی جارحیت قرار دیتے ہوئے الزام عائد کیا ہے کہ امریکا کا اصل مقصد وینزویلا کے تیل اور معدنی وسائل پر قبضہ حاصل کرنا ہے۔