لندن (این این آئی)برطانیہ کی وزارت دفاع نے کہا ہے کہ فضائی حدود کے قریب آنے والے نامعلوم طیارے کی موجودگی کی اطلاع ملنے کے بعد انہیں روکنے کے لیے لڑاکا طیارے روانہ کردئیے گئے۔میڈیارپورٹس کے مطابق وزارت دفاع کے ایک ترجمان نے کہا کہ برطانوی مفادات
اور فضائی حدود میں داخل ہونے والے نامعلوم طیارے کی موجودگی کی اطلاع پر جنگی طیاروں کو روکنے کے لیے بھیجا گیا تاکہ وہ انہیں روک سکیں۔تاہم وزارت دفاع نے کہا کہ ہم اس آپریشن کے مکمل ہونے تک کوئی اضافی تفصیلات نہیں دیں گے۔برطانوی ٹی وی کے مطابق طیارے کا اسکاٹ لینڈ کے شمال میں پتہ چلا ہے۔برطانوی ٹی وی نے مزید کہا کہ اس طرح کے واقعات کوئی غیر معمولی بات نہیں اور اس میں رائل ایئر فورس کے عملے نے برطانیہ کی فضائی حدود کے قریب روسی فوجی طیاروں کا پیچھا کیا تھا۔یہ فورس معمول کے مطابق سرحد قریب آنے والے ہوائی جہازوں کو روکتی اور ان کی نگرانی کرتی ہے۔اس حوالے سے کہا گیا کہ برطانوی بین الاقوامی فضائی حدود میں داخل ہونے والے روسی فوجی طیارے دوسرے فضائی صارفین کے لیے خطرہ بن سکتے ہیں کیونکہ وہ اکثر فضائی ٹریفک کنٹرول سے بات نہیں کرتے۔نومبر میں روسی اسٹریٹیجک بمبار طیاروں کے جواب میں جیٹ طیارے روانہ کیے گئے تھے۔اس وقت حکام کا کہنا تھا کہ جنگجو روسی طیارے کو حدود سے باہر لے گئے تھے اور جنگی طیارے برطانیہ کی فضائی حدود میں داخل نہیں ہوئے تھے۔
