پشاور (این این آئی)میئر پشاور کی نشست ہارنے پر پاکستان تحریک انصاف کے رہنمائوں کے درمیان اختلافات شدت اختیار کر گئے ،وزیر اعظم کے معاون خصوصی ارباب شہزاد کے بھتیجے ارباب محمد علی نے گورنر شاہ
فرمان کے احتساب کا مطالبہ کردیا۔ایک انٹرویومیں ارباب محمد علی نے کہا کہ وزیراعظم سے اپیل ہے گورنر خیبرپختونخوا شاہ فرمان کا احتساب کیا جائے، گورنر کی ذاتی انا اور مفاد کے باعث پارٹی پہلے بھی صوبائی اسمبلی کی دو نشستیں ہار چکی ہے۔انہوں نے کہا کہ میئر پشاور کے لئے پی ٹی آئی کا امیدوار رضوان بنگش امپورٹڈ تھا، رضوان بنگش پیراشوٹ کے ذریعے گورنر شاہ فرمان اور ان کے حواریوں کی تجوریاں بھر کر میئر بننے کا خواب دیکھ رہا تھا۔ان کا کہنا تھا کہ لوگوں نے میئر کی نشست کیلئے امپورٹڈ امیدوار کو مسترد کردیا ہے۔خیال رہے کہ ارباب محمد علی نے پشاور میئر نشست کی ٹکٹ کے لئے پی ٹی آئی کو درخواست بھی دی تھی، وہ 2013 میں ٹائون تھری کے سابق ناظم رہ چکے ہیں۔ارباب محمد علی کے بھائی ارباب شیر علی پی ٹی آئی کے رکن قومی اسمبلی ہیں۔
