سرگودھا (این این آئی)ہیوی ویٹ چمگادڑوں نے سرگودھا کے باغات پر قبضہ جما لیا جس سے امرود، کھجور، کینو، انگور اور کیلے کی فصل بری طرح متاثر ہوئی ہے۔سرگودھا کے مختلف علاقوں منگوانہ بنگلا، چک 120 اور

شاہ نکڈر کے علاقوں میں بھاری بھرکم چمگادڑوں نے خوف و ہراس پھیلایا ہوا ہے۔3 سے 4 کلو وزنی ہیوی ویٹ چمگادڑیں رات کے اوقات میں خوف ناک آوازوں کے ساتھ کئی کلو میٹر کا سفر طے کرتی ہیں اور دن کے وقت وہ مخصوص باغات اور درختوں پر بسیرا کرتی ہیں۔کسانوں کا کہنا ہے کہ ہیوی ویٹ چمگادڑیں نہ صرف خوف کا باعث بنی ہوئی ہیں بلکہ یہ ان کے باغات تک اجاڑ دیتی ہیں۔انہوں نے اپیل کی ہے کہ محکمہ لائیو اسٹاک اور محکمہ وائلڈ لائف کو اس طرف توجہ دینی چاہیئے۔محکمہ وائلڈ لائف کا کہنا ہے کہ چمگادڑیں مخصوص ایام میں آ کر یہاں سے خود ہی روانہ ہو جاتی ہیں۔