اسلام آباد (مانیٹرنگ ڈیسک /این این آئی)راولپنڈی میں کنٹونمنٹ بورڈ کے انتخابات میں شکست کا ملبہ ارکان اسمبلی پر ڈال دیا گیا ۔ نجی ٹی وی کے مطابق کنٹونمنٹ بورڈ راولپنڈی و چکلالہ میں پی ٹی آئی کی شکست پر ضلع راولپنڈی کی تنظیم نے سخت ردعمل دیتے ہوئے کہا ہے کہ
ضلعی تنظیم کو پارٹی ٹکٹ کے فیصلوں میں نظر انداز کیا گیا ہے اور اعلیٰ عہدیداران اور ممبران قومی وصوبائی اسمبلی کو راولپنڈی میں کنٹونمنٹ بورڈ انتخابات میں شکست کا ذمہ دار ہیں ، ان سے فوری طور پر استعفے لیے جائیں ۔ اس حوالے سے ضلعی تنظیم نے منظور کی گئی قررار داد میں اپنے تحفظات کا ازالہ نہ ہونے کی صورت میں شکست کے ذمہ داران کا مکمل بائیکاٹ کرنے کی قرارداد بھی منظور کرلی ہے ۔ پی ٹی آئی ضلع راولپنڈی کا کنونشن بھی آئندہ پندرہ دنوں میں منعقد کرنے کا اعلان کیا گیا ہے ۔دوسری جانب وزیراعظم عمران خان نے بڑے شہروں سے کنٹونمنٹ بورڈ کے بلدیاتی انتخابات کے نتائج بارے تجزیاتی رپورٹ تیار کرانے کا فیصلہ کیا ہے تاہم وزیر اعظم نے مجموعی کامیابی پراطمینان کا اظہار کیا ہے ۔ نجی ٹی وی نے ذرائع کے حوالے سے کہا ہے کہ وزیراعظم نے کنٹونمٹ بورڈ انتخابات پر تجزیاتی رپورٹ تیار کرانے کا فیصلہ کرتے ہوئے لاہور،پنڈی،ملتان اورپشاورکے نتائج کی رپورٹ تیار کرنے کا حکم دیا ہے۔ذرائع کے مطابق پارٹی کے سینئر رہنما ماضی کے نتائج سے موازنے کی رپورٹ تیار کریں گے، ووٹرزحکومتی اقدامات سے ناخوش یامقامی قیادت شکست کی وجہ بنی اس کا تجریہ ہوگا،رپورٹ میں ووٹ بینک بڑھنے یا کم ہونے کے حقائق سامنے لائے جائیں گے۔ذرائع نے بتایا کہ امیداروں کاچنائو،ووٹرز سے پارٹی قائدین کارویہ بھی رپورٹ میں شامل ہوگا۔
