مقبوضہ بیت المقدس (این این آئی )اسرائیل کے عبرانی ریڈیونے انکشاف کیا ہے کہ مراکش کے وزیراعظم سعد الدین عثمانی نے فلسطینیوں کے خلاف انسانی حقوق کی

سنگین پامالیوں کی وجہ سے اسرائیلی وزیر خارجہ یائرلبید کے ساتھ ملاقات سے انکار کردیا ہے۔میڈیارپورٹس کے مطابق اسرائیلی وزیر خارجہ یائرلبید 11 اور 12اگست کو مراکش کا دورہ کررہے ہیں۔ گذشتہ برس اسرائیل کے ساتھ تعلقات استوار کرنے کے بعد یہ ان کا پہلا دورہ مراکش ہے۔مراکشی ذرائع ابلاغ کے مطابق لبید اپنے مراکشی ہم منصب ناصر بوریطہ سے ملاقات کریں گے تاہم وزیراعظم سعدالدین عثمانی نے اسرائیلی وزیر خارجہ سے ملاقات سے انکار کردیا ہے۔ ان کا کہنا تھا کہ اسرائیل فلسطینیوں کے خلاف انسانی حقوق کی سنگین پامالیوں کا مرتکب ہو رہا ہے جس کی وجہ سے وہ یائرلبید کے ساتھ ملاقات نہیں کرسکتے۔اسرائیلی وزیرخارجہ نے تین ہفتے قبل اعلان کیا تھا کہ وہ اگست کے وسط میں مراکش کا دورہ کریں گے۔