اسلام آباد (مانیٹرنگ، این این آئی) وزیراعظم کے معاون خصوصی شہباز گل نے سماجی رابطے کی ویب سائٹ ٹوئٹر پر اپنے پیغام میں کہا کہ اوگرا کی سفارش پر پٹرول کی قیمت میں فی لیٹر 1.71 روپے کا اضافہ کیا جا رہا ہے، جبکہ ڈیزل کی قیمتوں میں کسی قسم کا اضافہ نہیں کیا جا رہا، ڈیزل کی قیمتوں میں اضافے سے عام آدمی اور کسان زیادہ متاثر ہوتا ہے اس لئے ڈیزل کی
قیمتوں میں اضافے کی سمری مسترد کر دی گئی ہے، یاد رہے کہ جن 27 ممالک میں قیمتیں پاکستان سے کم ہے ان میں سے زیادہ تر ممالک اپنی پٹرولیم مصنوعات میں خود کفیل ہیں۔ اس وقت پٹرولیم پراڈکٹس پر حکومت پاکستان تقریباً صفر کے قریب ٹیکس وصول کر رہی ہے، کورونا کی وجہ سے پوری دنیا مہنگائی کی زد میں ہے۔ اپنے ٹوئٹ میں ڈاکٹر شہباز گل نے لکھا کہ 26 جولائی کے ڈیٹا کے مطابق دنیا میں 27 ممالک میں پٹرول کی قیمت پاکستان سے کم اور 140 ممالک میں پاکستان سے زیادہ ہے، دنیا میں پٹرول کی اوسط قیمت 1.19 ڈالر فی لٹر لیکن پاکستان میں پٹرول کی قیمت 0.72 ڈالر فی لٹر ہے، دنیا میں پٹرولیم مصنوعات میں اضافہ 47 فیصد ہوا لیکن پاکستان میں گیارہ فیصد ہوا۔ دوسری جانب پاکستان مسلم لیگ (ن) کے صدر شہباز شریف نے کہا ہے کہ پیٹرول کی قیمت میں 1روپے71پیسے مزید اضافہ عوام کے ساتھ ظلم،زیادتی او رنا انصافی ہے، پہلے ہی ملک میں مہنگائی کا دیوعوام کا خون پی رہا ہے بیروزگاری کا سونامی ہے اور اب عوام کونوالے نوالے کیلئے مجبور کیا جارہا ہے۔ ٹوئٹر پر اپنے بیان میں شہباز شریف نے کہا کہ بجٹ پیش ہونے کے بعد پٹرول، بجلی،خوراک اور اشیائے ضروریہ کی قیمتوں میں مسلسل اضافے نے عوام کی کمرتوڑ کر رکھ دی ہے۔ مہنگائی کا ظلم اسی رفتارسے جار ی رہا توپورے معاشرے کو غربت اور بے چینی کی آگ کھا جائے گی۔ حکومت عوام سے زندہ رہنے کا حق چھین رہی ہے، یہ ظالمانہ اقدام واپس لیا جائے۔
