پشاور ( آن لائن) آزاد کشمیر الیکشن میں پریزائیڈنگ آفیسر اور سکول پرنسپل بجلی بندش پر آپس میں لڑپڑے، پولنگ عملے نے کام سے انکار کردیا۔ تفصیلات کے مطابق گورنمنٹ شہید حسنین علی شاہ ہائر سکینڈری اسکول کے پولنگ اسٹیشن میں

پریزائیڈنگ افسر اور اسکول پرنسپل کے درمیان ہاتھا پائی ہوگئی جس پر آزاد کشمیر کی قانون ساز اسمبلی کے لیے ہونے والے انتخابات کی ووٹنگ کے دوران پشاور میں قائم پولنگ اسٹیشن کے عملے نے کام سے انکار کر دیا۔بتایا گیا ہے کہ پشاور میں بھی حلقہ ایل اے 39 جموں 6 پر پولنگ کے لیے گورنمنٹ شہید حسنین علی شاہ ہائر سکینڈری اسکول میں پولنگ اسٹیشن قائم کیا گیا جہاں گورنمنٹ شہید حسنین علی شاہ ہائر سکینڈری اسکول کے پولنگ اسٹیشن میں پریزائیڈنگ افسر اور اسکول پرنسپل کے درمیان بجلی کی بندش پر ہاتھا پائی ہو گئی ، پریزائیڈنگ افسر نے بجلی بند ہونے کی شکایت کی تو اسکول پرنسپل پریزائیڈنگ افسر کی شکایت پر ناراض ہوگئے اور دونوں میں تلخ کلامی شروع ہوگئی جو ہاتھاپائی تک جا پہنچی جس پر پریزائیڈنگ افسر اور پولنگ عملے نے اسکول پرنسپل کے رویے کے خلاف احتجاج کرتے ہوئے ڈیوٹی دینے سے انکار کر دیا جس کے باعث حلقہ ایل اے 39 جموں 6 پر پولنگ کا عمل رک گیا جس پر پولیس نے پولنگ عملے اور اسکول پرنسپل کے درمیان صلح کروا دی۔