سرینگر(این این آئی)بھارتی خفیہ ایجنسی ریسرچ اینڈ اینا لیسز ونگ (را) کے سابق سربراہ ایس ایس دولت نے کہا ہے کہ دفعہ 370 ہمیشہ کیلئے ختم ہو گئی ہے اوراب اسے بحال نہیں کیا جائے گا۔کشمیرمیڈیاسروس کے مطابق ایس ایس دولت نے سری نگر میں قائم ایک خبر رساں ایجنسی کو خصوصی انٹرویو دیتے ہوئے کہا کہ انہیں اس بات کا پختہ یقین ہے کہ آرٹیکل 370 کا معاملہ ختم ہوچکا ہے۔
انہوں نے کہا کہ انہیں ذاتی طور پر یقین ہے کہ اس دفعہ کو اب واپس نہیں لایا جائے گا۔ ایس ایس دولت نے کہا کہ وہ تنازعہ کشمیر کے حل کے لئے ہمیشہ بات چیت کے پرجوش حامی رہے ہیں۔ انہوں نے کہا کہ حریت فورم کے چیئرمین میر واعظ عمر فاروق کا یقینا ایک کردار بنتا ہے اور وہ سمجھتے ہیں کہ میر واعظ کو اپنا کردارادا کرنے کی اجازت دی جانی چاہئے۔مقبوضہ جموںوکشمیر میں حد بندی کے عمل کے بارے میں ایک سوال کے جواب میں ، دولت نے کہا کہ اس عمل سے جموں کو تھوڑا سا فائدہ ہوسکتا ہے۔اس سوال کے جواب میں کہ پی ڈی پی کی سربراہ محبوبہ مفتی نے کہا ہے کہ حد بندی پینل کا اسکرپٹ پہلے ہی لکھا ہوا تھا ، انہوں نے کہا ’’مجھے امید ہے کہ محبوبہ کے تمام شکوک و شبہات غلط ثابت ہو نگے۔لائن آف کنٹرول پرجنگ بندی کے بارے میں دولت نے کہا کہ یہ ایک اچھا اقدام ہے۔ مقبوضہ علاقے میں سرکاری ملازمین کی برطرفی کے بارے میں انہوں نے کہا کہ صرف منتخب حکومت ہی ایسے معاملات حل کرسکتی ہے اوریہ منتخب حکومت ہی ہے جو لوگوں کو مطمئن کرسکتی ہے اور ان کے خدشات دور کرسکتی ہے۔ ایس ایس دولت نے کہا کہ ریاست کی بحالی کا مطالبہ جائز ہے جسے پورا کیا جانا چاہئے۔ انہوں نے کہا کہ نظربند نظربندآزادی پسند رہنماؤں کو رہا کرنے کی ضرورت ہے ۔
