اسلام آباد(آن لائن)موٹروے پولیس نے ایمانداری کی روایت برقرار رکھتے ہوئے ایک کروڑ چالیس لاکھ روپے نقد مالک کے حوالے کر دئیے۔ ابراہیم اسلام آباد سے پشاور کی جانب موٹروے سے سفر کر رہا تھا، گاڑی حادثے کا شکار ہونے کے بعد ڈرائیور نے مذکورہ رقم کے بارے میں موٹروے پولیس کو اطلاع دی تھی۔ موٹروے پولیس کی جانب سے رقم حفاظتی تحویل میں لے لی گئی۔

حادثے کی وجہ سے ڈرائیور شدیدشاک کے عالم میں تھا۔ حواس بحال ہوتے ہی موٹروے پولیس نے رقم ڈرائیور کے حوالے کر دی۔ ڈی آئی جی موٹروے زون اشفاق احمد کی جانب سے کاروائی میں حصہ لینے والے افسران کو شاباش دی ہے۔تفصیلات کے مطابق ایک گاڑی نمبر AAU 9898 جس میں ابراہیم نامی شخص اسلام آباد سے پشاور کی جانب بذریعہ موٹروے سفر کر رہا تھا کہ کرنل شیر خان انٹرچینج کے قریب گاڑی کو حادثہ پیش آیا۔ اطلاع پاتے ہی موٹروے پولیس کے ڈی ایس پی علاؤالدین اور سب انسپکٹر عاصم احمد موقع پر پہنچے اور امدادی کاروائی کا آغاز کر دیا۔ حادثے میں ڈرائیور محفوظ رہا لیکن ذہنی طور پر شدید شاک کی حالت میں چلا گیا۔ مدد کے دوران ڈرائیور نے موٹروے پولیس کی ٹیم کو بتایا کہ اس کے پاس کثیر رقم نقد کی صورت میں موجود ہے۔ صورتحال کو مدنظر رکھتے ہوئے ڈی ایس پی علاؤالدین نے نفری کے ہمراہ رقم کو حفاظتی تحویل میں لیتے ہوئے بیٹ آفس منتقل کر دیا۔ بعدازاں جب ڈرائیور کے حواس بحال ہوئے اور تسلی بخش صورتحال کے پیش نظر ایک کروڑ چالیس لاکھ روپے نقد ابراہیم کے حوالے کر دیے گئے جس پر اس نے موٹروے پولیس کا تہہ دل سے شکریہ ادا کیا۔ اس کاروائی کو سراہتے ہوئے ڈی آئی جی موٹروے اشفاق احمد نے افسران کو شاباش دی اور اس اعادے کا اظہار کیا کہ موٹروے پولیس عوام کی جان اور مال کی حفاظت جاری رکھے گی۔