اسلام آباد (مانیٹرنگ ڈیسک )بیلجیم نے پاکستان میں کورونا کیسز میں واضح کمی کے بعد پاکستان پر سے سفری پابندیاں ختم کرنے کا اعلان کر دیا۔تفصیلات کے مطابق
بیلجیم نے پاکستان کو کورونا ہائی رسک ممالک کی فہرست سے نکال کر پاکستان پر سفری پابندیاں ختم کردی ہیں۔ بین الاقوامی میڈیا رپورٹس کے مطابق اس سے قبل ترکی نے بھی پاکستان کے لئے سفری پابندیوں میں نرمی کا اعلان کیا تھا۔ خلیج اردو کے مطابق دوسری طرف بیلجیئم کی حکومت نے ہائی رسک، میڈیم اور کم خطرے والے خطوں کا ٹریفک لائٹ سسٹم متعارف کرایا ہے۔ اس سسٹم کا ذکر بیلجئیم کی سرکاری ویب سائٹ پر کیا گیا ہے۔ بیلجیم کی جانب سے یہ درجہ بندی ہر اتوار کو اپ ڈٰیٹ کی جاتی ہے جو پیر کے روز ویلیڈ ہوتی ہے۔ یہ نظام بیماریوں کے بچاؤ کے یورپی مرکز (ای سی ڈی سی) کی جانب سے ہر جمعرات کو جاری کردہ ڈیٹا اور معیار پر مبنی ہے۔ ہر ملک کو اس کے ڈیٹا کے حساب سے ایک رنگ تفویض کیا جاتا ہے۔ اور اسی رنگ کے حساب سے ہی بیلجیم کا سفر کرنے کی اجازت ہوتی ہے۔
